ނ. މާފަރުގައި އިމާރާތްކުރަން ހަމަޖެހިފައިވާ ފުލުހުންގެ މަރުކަޒުގެ ބިންގާ މިއަދު އަޅާ، އަމަލީ މަސައްކަތް ފަށައިފިއެވެ. މި މަޝްރޫޢުގެ ބިންގާ އެޅުމުގެ ރަސްމިއްޔާތު ބޭއްވުނީ، ރައީސުލްޖުމްހޫރިއްޔާ ޑރ. މުހައްމަދު މުއިއްޒު، ނ. އަތޮޅުގެ ރަށްރަށަށް ކުރައްވަމުންދާ ދަތުރުފުޅުގެ ތެރެއިން މާފަރަށް ވަޑައިގެންނެވި ދަތުރުފުޅާ ދިމާކޮށެވެ. ރައީސުލްޖުމްހޫރިއްޔާގެ އިތުރުން ކެބިނެޓުގެ ބައެއް ވަޒީރުންނާއި ދައުލަތުގެ އިސް ބޭފުޅުން ވެސް މި ދަތުރުފުޅުގައި ބައިވެރިވެ ވަޑައިގެންނެވިއެވެ.
މާފަރު ފުލުހުންގެ އިމާރާތުގެ ބިންގާ އަޅުއްވައިދެއްވީ ހޯމް މިނިސްޓަރ އަލީ އިހުސާންއެވެ. މި ރަސްމިއްޔާތުގައި ކޮމިޝަނަރ އޮފް ޕޮލިސް އިސްމާއިލް ނަވީންގެ އިތުރުން، މާފަރު ކައުންސިލްގެ ރައީސް މުހައްމަދު އަދުނާން ވެސް ބައިވެރިވެ ވަޑައިގެންނެވިއެވެ. މި މަޝްރޫޢުގެ މަސައްކަތް ކުރިއަށް ގެންދިއުމަށް ހަވާލުކުރެވިފައިވަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އާއެވެ.
ރާއްޖޭގެ ހުރިހާ ރަށެއްގައި ފުލުހުންގެ ޚިދުމަތް ފޯރުކޮށްދިނުމަށް ރައީސް ޑރ. މުހައްމަދު މުއިއްޒު ފައްޓަވައިގެން ކުރިއަށް ގެންދަވާ ސިޔާސަތުގެ ދަށުން ކުރިއަށް ގެންދެވޭ މަޝްރޫޢެއް ކަމުގައި މިވަނީއެވެ. ސަރުކާރުން ލަނޑުދަނޑިއަކަށް ބަހައްޓަވާފައިވަނީ 2026 ވަނަ އަހަރު ނިމުމުގެ ކުރިން ދިވެހިރާއްޖޭގެ އެންމެހައި ރަށްރަށުގައި ފުލުހުންގެ ޚިދުމަތް ގާއިމުކުރުމެވެ. މި މަޤްޞަދު ހާސިލުކުރުމަށްޓަކައި ރަށްރަށުގައި ޕޮލިސް ސްޓޭޝަންތަކާއި، ޕޮލިސް ޕޯސްޓުތަކާއި، ޕޮލިސް ޑެސްކުތައް ގާއިމުކުރުމުގެ މަސައްކަތް ވަރަށް ބާރަށް ކުރިއަށް ގެންދެވެމުން ދާކަމަށް ސަރުކާރުން ފާހަގަކުރައްވައެވެ.
ވޭތުވެދިޔަ އެއް އަހަރު ދުވަހުގެ ތެރޭގައި ގިނަ މަސައްކަތްތަކެއް ކުރެވި، 23 ރަށެއްގައި ފުލުހުންގެ ޕޯސްޓުތައް ހުޅުވައި، އެ ރަށްރަށުގެ ރައްޔިތުންނަށް ފުލުހުންގެ ޚިދުމަތް ފޯރުކޮށްދޭން ފަށާފައިވާކަން ފާހަގަކުރެވެއެވެ.
ރައީސުލްޖުމްހޫރިއްޔާގެ ނ. އަތޮޅުގެ ދަތުރުފުޅު މިއަދު ކުރިއަށް ގެންދެވޭނެ ކަމަށާއި، ދެން ވަޑައިގަންނަވާނީ ނ. ހެނބަދޫއަށް ކަމަށް ރިޔާސީ އޮފީހުން ވިދާޅުވެއެވެ. ހެނބަދޫގައި ފިޓްނަސް އެންޑް ރެކްރިއޭޝަން ސެންޓަރެއްގެ ބިންގާ އަޅުއްވައިދެއްވުމަށް ހަމަޖެހިފައިވާ ކަމަށާއި، އެ ބިންގާ އަޅުއްވައިދެއްވާނީ މިނިސްޓަރ އޮފް ފިޓްނަސް އެންޑް ރެކްރިއޭޝަން ޢަބްދުﷲ ރާފިއު ކަމަށް ވެސް މަޢުލޫމާތު ލިބެއެވެ. މީގެ އިތުރުން ހެނބަދޫގައި އަލަށް އިމާރާތްކުރެވޭ މިސްކިތެއްގެ ބިންގާ އަޅުއްވައިދެއްވުމަށް ވެސް ހަމަޖެހިފައިވާ ކަމަށް ރިޔާސީ އޮފީހުން ހާމަކުރެއެވެ.
ކޮމެންޓު ފޮނުވާ