ޑޮލަރު ލިބުން ދަތިވެ، ވިޔަފާރިތަކަށް ކުރާ ނޭދެވޭ އަސަރުތަކާ ގުޅިގެން އެމްޑީޕީގެ ޕީޖީން ގަވަރުނަރާ ބައްދަލުކުރަން އެދިއްޖެ

ރާއްޖޭގައި ޑޮލަރު ލިބުން ވަރަށް ބޮޑަށް ދަތިވެ، ވިޔަފާރިތަކަށް ކުރާ ނޭދެވޭ އަސަރުތަކާ ގުޅިގެން އިދިކޮޅު އެމްޑީޕީގެ ޕާލިމަންޓްރީ ގްރޫޕުން މޯލްޑިވްސް މަނިޓަރީ އޮތޯރިޓީގެ ގަވަރުނަރު އަހުމަދު މުނައްވަރާ ބައްދަލުކުރުމަށް އެދި ސިޓީ ފޮނުވައިފިއެވެ. ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމްގެ ނަމުގައި ފޮނުވި މި ސިޓީގައި ވަނީ ޑޮލަރުގެ ކަޅު ބާޒާރު ރަސްމީކޮށް އުފެދި، ވިޔަފާރިތަކަށް ޑޮލަރު ހޯދުން ނުހަނު ދަތިވެފައިވާ ކަމަށެވެ.

ބޭރު ފައިސާއާ ބެހޭ ގާނޫނަށް މިއަހަރު އަމަލުކުރަން ފެށި ނަމަވެސް، އެ ގާނޫނު ރަނގަޅަށް ތަންފީޒު ނުކުރެވޭކަމަށާއި، ޓޫރިޒަމް ވިޔަފާރިތަކުން ބޭންކުތަކަށް ޖަމާކުރާ ޑޮލަރުގެ 90 ޕަސަންޓު އެމްއެމްއޭއަށް ނެގުމުން، މުދާ އިމްޕޯޓުކުރާ ފަރާތްތަކަށް ޑޮލަރު ހޯދުން ވަރަށް ބޮޑަށް ދަތިވެފައިވާކަން އެ ސިޓީގައި ފާހަގަކޮށްފައިވެއެވެ.

ސަރުކާރުގެ ބޭނުންތަކަށް ޑޮލަރު ހޯދުމަށްޓަކައި ބޭރު ފައިސާ މާރުކުރުމުގެ ގަވާއިދުތަކަށް ގެންނަމުންދާ ކުއްލި ބަދަލުތަކުގެ ސަބަބުން، ޑޮލަރު ލިބުން އިތުރަށް ދަތިވެދާނެކަމުގެ ބިރު އޮތްކަމަށް އެމްޑީޕީން ވަނީ ފާހަގަކޮށްފައެވެ. މިކަމުގެ ސަބަބުން ގިނަ ވިޔަފާރިތައް ހުއްޓުމަކަށް އަތުވެދާނެކަމަށް ބެލެވޭތީ، މި މައްސަލައާ ގުޅޭގޮތުން ވަރަށް އަވަހަށް މަޝްވަރާކުރުމަށް ފުރުޞަތު ދެއްވުމަށް އެމްޑީޕީ ޕާލިމަންޓްރީ ގްރޫޕުން ވަނީ އެދިފައެވެ.

ކަޅު ބާޒާރުގައި ޑޮލަރެއްގެ އަގު 20 ރުފިޔާއަށް އަރާފައިވާ މި ހާލަތުގައި، ދިވެހި ރައްޔިތުންނަށާއި ރާއްޖޭން ބޭރަށް ދަތުރުކުރާ މީހުންނަށް ވަރަށް ބޮޑެތި ދަތިތައް ކުރިމަތިވަމުންދާކަން އެމްޑީޕީން ފާހަގަކޮށްފައިވެއެވެ. މުދަލާއި ޚިދުމަތުގެ އަގުތައް އިންތިހާއަށް މައްޗަށް ގޮސް، ކާބޯތަކެތީގެ އަގު ބޮޑުވުމާއި ތަކެތި ލިބުން ދަތިވާނެކަމަށް ވެސް އެ ޕާޓީން ވަނީ އިންޒާރުދީފައެވެ.

ރާއްޖެއަށް ބޭނުންވާ ޒަރޫރީ ތަކެތި ބޭރުން އެތެރެކުރަން ޖެހޭއިރު، ވިޔަފާރިވެރިން ކަޅު ބާޒާރުން ޑޮލަރު ގަންނަން މަޖުބޫރުވުމުން ތަކެތީގެ އަގުތައް ވަރަށް ބޮޑަށް އުފުލެމުން ދާކަން ފާހަގަކުރެވެއެވެ. މުސާރައާއި އާމްދަނީ އިތުރުނުވާ ހާލަތުގައި ތަކެތީގެ އަގު ބޮޑުވުމުން، އާންމުންގެ ގަނެވޭ ބާރު ދަށްވެ، އިގްތިޞާދަށް ނޭދެވޭ އަސަރުތަކެއް ކުރަމުންދެއެވެ.

މި ހާލަތާ ގުޅިގެން ވިޔަފާރީގެ އާމްދަނީއާއި މުދަލުން ނަގާ ޓެކުހުން ދައުލަތަށް ލިބޭ އާމްދަނީ މި އަހަރުގެ މިހާތަނަށް 680 މިލިއަން ރުފިޔާ ދަށަށް ގޮސްފައިވާކަން ފިނޭންސް މިނިސްޓްރީގެ ތަފާސްހިސާބުތަކުން ދައްކައެވެ.

ޑޮލަރުގެ މި ހާލަތާ ގުޅިގެން ގަވަރުނަރު މުނައްވަރުގެ ނާގާބިލުކަން ފާހަގަކޮށް، ކުރީގެ ރައީސް އަބްދުﷲ ޔާމީން ވަނީ ފާޑުވިދާޅުވެފައެވެ.