ސިނާންގެ މެމްބަރުކަން ގެއްލިފައިވާ ކަމަށް ބުނާ މައްސަލައިގެ އަޑުއެހުންތައް ނިމި ދެން އޮތީ ހުކުމް ކުރުން

ހިތަދޫ އުތުރު ދާއިރާގެ މެމްބަރު މުހައްމަދު ސިނާންގެ ރައްޔިތުންގެ މަޖިލީހުގެ ގޮނޑި ގެއްލިފައިވާ ކަމަށް ކަނޑައެޅުމަށް އެދި ސުޕްރީމް ކޯޓަށް ހުށަހެޅުނު މައްސަލައިގެ އަޑުއެހުންތައް މިއަދު ނިމިއްޖެއެވެ. މި މައްސަލަ ބަލާ ފަސް ފަނޑިޔާރުންގެ ބެންޗުން ދެން ނިންމާނީ ހުކުމް ކުރުމުގެ މަރުހަލާ އެވެ.

ޣާލިބު ސަލީމު ނަމަކަށް ކިޔާ ފަރާތަކުން ފެބްރުއަރީ 13 ގައި ހުށަހެޅި މި މައްސަލައިގައި ތުހުމަތު ކުރަނީ، ސިނާން އެހެން ބަޔަކާ ގުޅިގެން މޯލްޑިވްސް އިސްލާމިކް ބޭންކުން ނަގާފައިވާ 3.8 މިލިއަން ރުފިޔާގެ ލޯނެއް، ހިތަދޫ މެޖިސްޓްރޭޓް ކޯޓުގެ ހުކުމާ އެއްގޮތަށް ދައްކާފައި ނުވާ ކަމަށެވެ. އޮކްޓޯބަރު 14، 2024 ގައި ހިތަދޫ ކޯޓުން ކުރި ހުކުމުގައި ވަނީ އެ ތާރީހާ ހަމައަށް ދައްކަން ހުރި 2.5 މިލިއަން ރުފިޔާ ހަ މަހުގެ މުއްދަތަކަށް ބަހާލައިގެން ބޭންކަށް ދެއްކުމަށް އަންގާފަ އެވެ.

މިއަދުގެ އަޑުއެހުމުގައި ދެ ފަރާތުގެ ވަކީލުން ދައްކާފައިވާ ވާހަކަތަކުން ފާހަގަވެގެން ދިޔައީ ހުކުމް ލިބުނު ގޮތާމެދު ޚިޔާލު ތަފާތުވުމެވެ. ޣާލިބުގެ ވަކީލް އިބްރާހިމް ޝިޔާމް ވިދާޅުވި ގޮތުގައި ހުކުމް ކުރިތާ އެއް ދުވަސް ފަހުން ކޯޓުން ސިނާނަށް ވައިބާ މެދުވެރިކޮށް ހުކުމް ފޮނުވުމަށްފަހު، ހުކުމް ލިބުނުކަން ކަށަވަރުކުރުމަށް ގުޅައިގެން އެކަން އަންގާފައިވާ އިރު، ސިނާން ވަނީ އެ މެސެޖަށް ރިޕްލައި ކޮށްފަ އެވެ.

ނަމަވެސް ސިނާންގެ ވަކީލުން ބުނި ގޮތުގައި ސިނާން ވައިބާ މެސެޖު ބެލި ނަމަވެސް ހުކުމް ބައްލަވާފައެއް ނުވެ އެވެ. އަދި ހުކުމް އޮތްކަން އެނގުނު ފަހުން ވަނީ ދަރަނި ދެއްކުމަށް މަސައްކަތް ފަށާފައި ކަމަށާއި ފައިސާ ހަމަޖެއްސުމަށް ދުވަސްތަކެއް ހޭދަވި ކަމަށް ވެސް ވަކީލު ފާހަގަކުރި އެވެ. ސިނާންގެ ވަކީލު ކުރިން ވިދާޅުވެފައި ވަނީ ދަރަނި ދެއްކުން ލަސްވެފައި ވަނީ ގައިރު ހާޒިރުގައި ކުރި ހުކުމެއްކަން ނޭނގޭތީ ކަމަށެވެ.

މިހާރު ސިނާން ވަނީ ސުޕްރީމް ކޯޓަށް މި މައްސަލަ ހުށަހެޅުމާ ގުޅިގެން ދަރަނީގެ ފައިސާ ބޭންކަށް ދައްކައި ހަލާސްކޮށްފަ އެވެ. މައްސަލަ ބަލާ ފަނޑިޔާރުންގެ ބެންޗުގައި ހިމެނެނީ ފަނޑިޔާރު އައިޝާ ޝުޖޫން މުހައްމަދު، އަލީ ރަޝީދު ހުސެއިން، ޑރ. މުހައްމަދު އިބްރާހީމް، ހުސެއިން ޝަހީދު އަދި މުހައްމަދު ސަލީމް އެވެ.