ދިވެހިރާއްޖެ މިނިވަންވިތާ 60 އަހަރު ފުރުމުގެ މުނާސަބަތު މި މަހު ފާހަގަކުރާއިރު، މި ތާރީޚީ ދުވަސް ފާހަގަކުރުމަށް ޚާއްޞަ ލޯގޯއެއް ރައީސުލްޖުމްހޫރިއްޔާގެ އޮފީހުން ތައްޔާރުކޮށް ހާމަކޮށްފިއެވެ.
1965 ވަނަ އަހަރުގެ ޖުލައި 26 ވަނަ ދުވަހު އިނގިރޭސިވިލާތުގެ ހިމާޔަތުގެ ދަށުން ދިވެހިރާއްޖެ މުޅިން މިނިވަންވުމާއެކު، މި އަހަރު ފާހަގަކުރަނީ ރާއްޖޭގެ މިނިވަންކަމުގެ 60 ވަނަ އަހަރެވެ. މި މުހިންމު ތާރީޚީ ހަނދާން ދިރިއުޅުވުމަށްޓަކައި ތައްޔާރުކުރި ލޯގޯގައި ދިވެހިރާއްޖޭގެ ދިދައާއި މޫދު އަދި އަތޮޅުތަކުގެ ސިފަތައް ފެންނަން ހުރިއިރު، "މިނިވަން 60″ މިހެން އިނގިރޭސި ބަހުންނާއި ދިވެހި ބަހުން ލިޔެފައިވެއެވެ. ހަމައެއާއެކު ލޯގޯގެ ތިރީ ބައިގައި "ފަހުރުވެރި މިނިވަން ފަސްދޮޅަސް" މިހެން ލިޔެވިފައިވެއެވެ.
ސަރުކާރުން ނިންމާފައިވާ ގޮތުގައި މި ޚާއްޞަ ލޯގޯ އަންނަ އަހަރުގެ ޖުލައި 25 ވަނަ ދުވަހުގެ ނިޔަލަށް، އެއް އަހަރު ދުވަހުގެ މުއްދަތަކަށް ބޭނުންކުރެވޭނެއެވެ. ސަރުކާރުގެ އިދާރާތަކުން ފޮނުވާ ލިޔެކިޔުންތަކާއި ސިޓީތަކުގައި މި ލޯގޯ ހިމެނުމަށް ރައީސުލްޖުމްހޫރިއްޔާގެ އޮފީހުން އެންގުން ފޮނުވާފައިވެއެވެ.
މި އަހަރުގެ މިނިވަން ދުވަހުގެ ހަފްލާތައް ވަރަށް ފުޅާދާއިރާއެއްގައި ބާއްވަން ސަރުކާރުން ރާވާފައިވާކަން ފާހަގަކުރެވެއެވެ. އެގޮތުން ވެލާނާ އިންޓަނޭޝަނަލް އެއާޕޯޓުގެ އައު ޓާމިނަލް ބިލްޑިންގ ހުޅުވުމުގެ ރަސްމިއްޔާތު މިނިވަން ދުވަހު ބޭއްވުމަށް ހަމަޖެހިފައިވެއެވެ.
މީގެ އިތުރުން ހުޅުމާލޭގައި އެޅެމުންދާ ދެ ކޯޓު އިމާރާތް މިނިވަން ދުވަހު ރަސްމީކޮށް ހުޅުވުމަށް ވެސް ތައްޔާރީތައް ކުރިއަށްދެއެވެ. މި އިމާރާތްތަކަކީ މާލޭގައި ހިންގަމުންދާ ކޯޓުތަކުގެ ޖާގައިގެ ދަތިކަން ޙައްލުކުރުމުގެ ގޮތުން އަޅާ އިމާރާތްތަކެއްކަމުން، ޢަދުލު އިންސާފުގެ ޚިދުމަތް ފުޅާކުރުމަށް މުހިންމު ދައުރެއް އަދާކުރާނެކަމަށް ބެލެވެއެވެ.
ކޮމެންޓު ފޮނުވާ