ތ. ވިލިފުށީ ފަޅުތެރޭގައި ހުރި ތެޔޮ ބޯޓެއްގައި މިއަދު ހެނދުނު އަލިފާން ރޯވެ، އެ ހާދިސާގައި މީހަކު ވަރަށް ބޮޑަށް ފިހިފައިވާ ކަމަށް މަޢުލޫމާތު ލިބިފައިވެ އެވެ.
މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން ބުނެފައިވާ ގޮތުގައި، މި ހާދިސާގެ މަޢުލޫމާތު އެ އިދާރާއަށް ލިބިފައިވަނީ މިއަދު ހެނދުނު 9:40 ގައެވެ. ހާދިސާ ހިނގުމާ ގުޅިގެން އެމްއެންޑީއެފްގެ ސެންޓްރަލް އޭރިއާ ކޮމާންޑްގެ ފަޔާ ކޮމްޕޯނަންޓްގެ ސިފައިން ވަގުތުން ހަރަކާތްތެރިވެ، އަލިފާން ނިއްވުމުގެ މަސައްކަތް ފަށާފައިވާ ކަމަށް އެ އިދާރާއިން މަޢުލޫމާތު ދީފައިވެ އެވެ.
ވިލިފުށީ ކައުންސިލްގެ ރައީސް ހުސައިން ޖަބީން ބައެއް މީޑިއާތަކަށް މައުލޫމާތު ދެއްވަމުން ވިދާޅުވެފައިވަނީ، ހާދިސާގައި ފިހުނު މީހާއަށް ވިލިފުށީ ހެލްތު ސެންޓަރުގައި ފަރުވާ ދެމުންގެންދާ ކަމަށެވެ. އަދި އެމްއެންޑީއެފްގެ ސިފައިންނާއި ކައުންސިލުން ގުޅިގެން އަލިފާން ނިއްވުމުގެ މަސައްކަތް ކުރިއަށް ގެންދާ ކަމަށާއި، އަލިފާން ރޯވި ބޯޓު މިހާރު ވަނީ ވާ ޖަހައިގެން ފަޅުތެރެއިން ބޭރަށް ގެންގޮސްފައި ކަމަށް ކައުންސިލް ރައީސް ފާހަގަކުރެއްވި އެވެ.
ޖަބީން ވިދާޅުވި ގޮތުގައި، މިފަދަ ހާދިސާއެއް ވިލިފުށީގައި ހިނގީ މިއީ ދެވަނަ ފަހަރެވެ. ނަމަވެސް މި ހާދިސާގެ ސަބަބާއި ތަފްސީލު މަޢުލޫމާތު އަދި ސާފުވެފައެއް ނުވެ އެވެ.
ކޮމެންޓު ފޮނުވާ