ޒަކާތު ފަންޑުގެ ފަޤީރުންގެ ދަފްތަރުގައި ރަޖިސްޓަރީ ކުރެވިފައިވާ ފަރާތްތަކުގެ ތެރެއިން ކެންސަރު ފަދަ ދާއިމީ ބޮޑެތި ބަލިތަކުގައި ފަރުވާ ހޯދާ ފަރާތްތަކުގެ ޞިއްޙީ ފަރުވާ އަށް އެހީތެރިވުމަށް ޚާއްޞަ އިންޝުއަރެންސް ޕްރޮގްރާމެއް މުޙައްރަމް 1447 އިން ފެށިގެން ތަޢާރަފު ކުރުމަށް ނިންމައިފިއެވެ.
މި ޚާއްޞަ އިންޝުއަރެންސް ސްކީމް ތަންފީޒު ކުރުމަށް އެލައިޑް އިންޝުއަރެންސް ކޮމްޕެނީއާ ގުޅިގެން މަސައްކަތް ކުރާނެ ކަމަށް މިނިސްޓްރީން ބުނެއެވެ. މި ޕްރޮގްރާމްގެ މައިގަނޑު މަޤްޞަދަކީ އާސަންދައިން ކަވަރ ނުކުރާ ޞިއްޙީ ޚިދުމަތްތަކާއި ބޭސްފަރުވާއަށް ބޭނުންވާ ޚަރަދުތައް ހަމަޖެއްސުމާއި، ބައެއް ޙާލަތްތަކުގައި ފުރާނަ ސަލާމަތް ކުރުމަށްޓަކައި ރާއްޖެއިން ބޭރުން ހޯދަންޖެހޭ ޚާއްޞަ ފަރުވާތަކާއި ބޭސް ލިބޭނެ މަގު ތަނަވަސް ކޮށްދިނުމެވެ.
ސަރުކާރުން ޒަކާތުގެ ނިޒާމް ފުޅާކޮށް ހަރުދަނާ ކުރުމަށް ކުރަމުންދާ މަސައްކަތުގެ ތެރެއިން ޒަކާތަށް ޚާއްޞަ މުސްތަޤިއްލު އިދާރާއެއް ޤާއިމުކޮށްފައިވާއިރު، މިދިޔަ އަހަރަކީ ޒަކާތުގެ ގޮތުގައި އެންމެ ގިނަ އަދަދަކަށް ފައިސާ ޖަމާވި އަހަރު ކަމަށް ރެކޯޑުތަކުން ދައްކައެވެ. މި އާ އިންޝުއަރެންސް ޕްރޮގްރާމަކީ ޒަކާތު ފަންޑުން އެހީތެރިކަން ފޯރުކޮށްދޭ ފަރާތްތަކަށް ޞިއްޙީ ޚިދުމަތްތައް ފުޅާކޮށް، އެ ފަރާތްތަކުގެ ދިރިއުޅުމުގެ ފެންވަރު ރަނގަޅު ކުރުމަށް ނަގާ މުހިންމު ފިޔަވަޅެކެވެ.
ކޮމެންޓު ފޮނުވާ