ދިރާސީ އަލް އަހަރު ފެށުމުގެ ކުރިން ރާއްޖޭގެ ހުރިހާ ސްކޫލެއްގައި އެއާކޮންޑިޝަން ހަރުކޮށް ނިންމުމުގެ މަސައްކަތް ފެނަކަ ކޯޕަރޭޝަނާ މިއަދު ހަވާލުކޮށްފިއެވެ. މި މަޝްރޫއު ފުރިހަމަކުރުމަށް 54 މިލިއަން ރުފިޔާ ހަރަދުވާނެ ކަމަށް އެޑިއުކޭޝަން މިނިސްޓްރީން ހާމަކޮށްފިއެވެ.
ސަރުކާރުގެ "ކޫލް ސްކޫލް" ޕްރޮޖެކްޓުގެ ދަށުން މި މަސައްކަތް ކުރުމަށް އެޑިއުކޭޝަން މިނިސްޓްރީގައި ބޭއްވި ރަސްމިއްޔާތެއްގައި އެއްބަސްވުމުގައި ސޮއިކުރެއްވީ އެޑިއުކޭޝަން މިނިސްޓަރު ޑރ. އިސްމާއިލް ޝަފީއު އާއި ފެނަކައިގެ މެނޭޖިން ޑިރެކްޓަރު މުހައްމަދު ނަޖާހުއެވެ.
މި ރަސްމިއްޔާތުގައި ވާހަކަދައްކަވަމުން މިނިސްޓަރު އިސްމާއިލް ފާހަގަކުރެއްވި ގޮތުގައި، ރާއްޖޭގެ ފިނިހޫނުމިން ބައެއް ދުވަސްވަރު 40 ޑިގްރީއަށްވުރެ މަތިވާއިރު، 30 ދަރިވަރުން ތިބޭ ކްލާސްރޫމެއްގައި ކިޔެވުމަކީ ވަރަށް ބޮޑު ގޮންޖެހުމަކަށް ވެފައިވާ ކަމެކެވެ. އެހެންކަމުން ދަރިވަރުންނަށް ފަސޭހަ މާހައުލެއްގައި ތަޢުލީމު ހާސިލުކުރުމުގެ ފުރުޞަތު ތަނަވަސްކޮށްދިނުމަށް ސަރުކާރުން ޚާއްޞަ އިސްކަމެއް ދެމުންދާ ކަމަށް މިނިސްޓަރު ވިދާޅުވިއެވެ.
މި މަޝްރޫއުގެ މަސައްކަތް ސެޕްޓެމްބަރު މަހު ނިމުމަކާ ހަމައަށް ސްކޫލުތަކަށް އޭސީ ފޮނުވައި، ހަރުކުރުމުގެ މަސައްކަތް ފެށޭނެ ކަމަށް މިނިސްޓަރު ވިދާޅުވިއެވެ. އަދި އަންނަ ޖެނުއަރީ މަހު ސްކޫލުތައް ހުޅުވުމުގެ ކުރިން މި މަސައްކަތް މުޅިން ފުރިހަމަވާނެ ކަމުގެ ޔަޤީންކަން ދެއްވިއެވެ.
ފެނަކައިގެ މެނޭޖިން ޑިރެކްޓަރު މުހައްމަދު ނަޖާހު ވިދާޅުވި ގޮތުގައި، މި މަޝްރޫއާ ގުޅިގެން ރަށްރަށުގެ ކަރަންޓު ވިއުގަ ވެސް ހަރުދަނާކުރެވޭނެއެވެ. އަދި ރައީސުލްޖުމްހޫރިއްޔާގެ އިރުޝާދުގެ ދަށުން ހުރިހާ ރަށެއްގެ ފެނާއި ނަރުދަމާ ޚިދުމަތް ރަނގަޅުކުރުމުގެ މަސައްކަތް ވެސް މި ޕްރޮޖެކްޓާ އެކު ކުރިއަށް ގެންދެވޭނެ ކަމަށް ނަޖާހު ހާމަކުރެއްވިއެވެ.
ފާއިތުވި އަހަރުގެ ޖޫން މަހު ސަރުކާރުން އިފްތިތާޙުކުރި "ކޫލް ސްކޫލް" ޕްރޮޖެކްޓުގެ ލަނޑުދަނޑިއަކީ ދެ އަހަރު ދުވަހުގެ ތެރޭގައި ރާއްޖޭގެ ހުރިހާ ސްކޫލެއްގެ ކްލާސްރޫމްތަކާއި ހޯލުތައް އެއާކޮންޑިޝަން ކުރުމެވެ. މި މަޝްރޫއުގެ ސަބަބުން ދައުލަތުން މިހާރު ކުރާ ކަރަންޓު ޚަރަދަށް 38 ޕަސެންޓުގެ އިތުރުވުމެއް އަންނާނެ ކަމަށް އަންދާޒާކުރެވޭއިރު، އޭގެ 30 ޕަސެންޓަކީ އާކުރަނިވި ހަކަތަ ބޭނުންކޮށްގެން ފޫބެއްދޭނެ ކަމަށް މިނިސްޓްރީން ބުނެއެވެ.
ކޮމެންޓު ފޮނުވާ