ދެކުނުގެ އަތޮޅުތަކަށް ބޯކޮށް ވާރޭވެހި ގުގުރާނެ؛ މެޓް އިން ހުދު ސަމާލު ނެރެފި

ރާއްޖޭގެ ދެކުނުގެ އަތޮޅުތަކަށް މިއަދު ބޯކޮށް ވާރޭވެހި، ބައެއް ސަރަހައްދުތަކުގައި ގުގުރުމާއެކު ވިއްސާރަ ކުރާނެކަމަށް ރާއްޖޭގެ މޫސުމާ ބެހޭ ގައުމީ އިދާރާ، މެޓް އިން ލަފާކޮށްފިއެވެ. މިއަދުގެ މޫސުމީ ހާލަތު ދެކުނުގެ އަތޮޅުތަކަށް ވަރަށް ގޯސްވެފައިވާކަމަށް މެޓް އިން ފާހަގަކޮށްފައިވެއެވެ.

މެޓް އިން ނެރެފައިވާ މޫސުމީ ލަފާގައި ބުނެފައިވާ ގޮތުގައި، އުތުރާއި މެދުރާއްޖެ ތެރޭގެ ބައެއް ސަރަހައްދުތަކަށް ކެރީގެ އަސަރުތައް ފޯރިދާނެ ނަމަވެސް، އެ ސަރަހައްދުތަކުގެ މޫސުން އާންމުގޮތެއްގައި ރަނގަޅުވާނެއެވެ.

ހުޅަނގާއި ހުޅަނގު އުތުރުން އުތުރާއި މެދުރާއްޖެ ތެރޭގެ އަތޮޅުތަކަށް ގަޑިއަކު 8 މޭލާއި 18 މޭލާ ދެމެދުގެ ބާރުމިނުގައި ވައި ޖެހޭނެއެވެ. ދެކުނުގެ އަތޮޅުތަކަށް ގަޑިއަކު 5 މޭލާއި 15 މޭލާ ދެމެދުގެ ބާރުމިނުގައި ވައި ޖެހޭނެ ކަމަށް ލަފާކުރެވެއެވެ. ވިލާގަނޑުގައި ގަޑިއަކު 35 މޭލަށް ވުރެ ބާރަށް ވައި ޖެހުމުގެ ފުރުސަތު އޮތްކަމަށް މެޓް އިން ވިދާޅުވެފައިވެއެވެ.

ކަނޑުގެ ހާލަތަށް ބަލާއިރު، އުތުރާއި މެދުރާއްޖެ ތެރޭގެ ކަނޑުތައް އާދައިގެ މިންވަރަށްވުރެ ގަދަވާނެ ކަމަށް ލަފާކުރެވޭއިރު، ދެކުނުގެ ކަނޑުތައް އާދައިގެ ވަރަކަށް މަޑުވާނެއެވެ. ވިލާގަނޑުގައި ނަމަވެސް ކަނޑު ގަދަވާނެކަމަށް މެޓް އިން ފާހަގަކޮށްފައިވެއެވެ.

މޫސުން ގޯސްވެފައިވާތީ، ގއ. އަތޮޅުން ފެށިގެން އައްޑޫ ސިޓީގެ ނިޔަލަށް ހުދު ސަމާލު ނެރެފައިވެއެވެ. މި ސަމާލުގައި ވިދާޅުވެފައިވާ ގޮތުގައި، މި ސަރަހައްދުތަކަށް ބޯކޮށް ވާރޭވެހުމާއެކު ގުގުރާނެ ކަމަށާއި، ވިލާގަނޑުގައި ގަޑިއަކު 40 މޭލަށް ވައި ގަދަވާނެކަމަށް ލަފާކުރެވެއެވެ. މެޓް އިން ވަނީ މި ސަރަހައްދުތަކުގެ ރައްޔިތުންނަށް ސަމާލުވުމަށް އިލްތިމާސްކޮށްފައެވެ.