ށ. ފުނަދޫ އެއާޕޯޓުގެ ފަޔަރ ވެހިކަލަށް ދިމާވި ޓެކްނިކަލް މައްސަލައެއްގެ ސަބަބުން ވަގުތީ ގޮތުން ބަންދުކުރި އެ އެއާޕޯޓުގެ އޮޕަރޭޝަންތައް މިހާރު ވަނީ އަލުން ފަށާފައެވެ. މި ކަން ރީޖަނަލް އެއާޕޯޓްސް ކޮމްޕެނީ (އާރުއޭސީއެލް) އިން ވަނީ ހާމަކޮށްފައެވެ.
އެއާޕޯޓުގައި ބޭނުންކުރާ ފަޔަރ ވެހިކަލަށް ދިމާވި މައްސަލައެއްގެ ސަބަބުން މިއަދު ހެނދުނު އެތަނުގެ އޮޕަރޭޝަންތައް ހުއްޓާލަން ޖެހުނެވެ. މި ސަބަބާހުރެ މޯލްޑިވިއަން އެއާލައިންއިން ފުނަދޫއަށް ޝެޑިއުލްކޮށްފައިވާ ފްލައިޓުތައް ނ. މާފަރަށް ޑައިވާޓުކުރަން ޖެހުނު ކަމަށް މަޢުލޫމާތު ލިބިފައި ވެއެވެ.
އާރުއޭސީއެލްގެ މިހާރުގެ މެނޭޖުމަންޓުން ބުނި ގޮތުގައި، ކުންފުނިން ބަލަހައްޓާ ހުރިހާ އެއާޕޯޓުތަކުގައި ބޭނުންކުރަމުން އަންނަނީ ދުވަސްވެ ހަލާކުވެފައިވާ ފަޔަރ ޓްރަކުތަކެކެވެ. މި ޓްރަކުތައް ބަދަލުކުރުމުގެ މަސައްކަތް މިހާރު ވަނީ ފަށާފައި ކަމަށާއި، މި ކަމުގައި މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އާއި ކަމާބެހޭ އެހެން އިދާރާތަކުގެ އެހީތެރިކަން ހޯދަމުން ގެންދާ ކަމަށް ކުންފުނިން ވިދާޅުވިއެވެ.
"މިއީ ކުރީގެ ސަރުކާރުތަކުން އެއާޕޯޓުތަކަށް ބޭނުންވާ ސަމާލުކަން ނުދިނުމުގެ ނަތީޖާއެއް. އެތައް އަހަރެއް ވަންދެން އެއާޕޯޓުތަކުގައި ހުރި ފަޔަރ ޓްރަކުތައް އާކޮށް މަރާމާތު ނުކުރެވި ހުރުމުން މިފަދަ ހާދިސާތައް ދިމާވަމުން އަންނަނީ،" އާރުއޭސީއެލްއިން ބުންޏެވެ.
ކުންފުނިން އިތުރަށް ބުނި ގޮތުގައި، މިފަދަ ކަންތައްތައް ތަކުރާރު ނުވާނެ ގޮތަށް ފިޔަވަޅު އަޅައި، އެއާޕޯޓުތަކުގެ ސަލާމަތީ ނިޒާމު ހަރުދަނާކުރުމަށް ބޭނުންވާ ހުރިހާ މަސައްކަތެއް ކުރާނެއެވެ. ފުނަދޫ އެއާޕޯޓަކީ ރާއްޖޭގެ އުތުރުގައި ހުންނަ މުހިންމު ރީޖަނަލް އެއާޕޯޓެއް ކަމުން، އެތަނުގެ ޚިދުމަތްތައް ދެމެހެއްޓެނިވި ގޮތެއްގައި ފޯރުކޮށްދިނުމަކީ ކުންފުނީގެ އިސްކަމެއް ކަމަށް ވެސް އާރުއޭސީއެލްއިން ފާހަގަކުރިއެވެ.
ކޮމެންޓު ފޮނުވާ