ތ. ކަނޑޫދޫ ސްކޫލްގައި 11 އަހަރުގެ ދަރިވަރެއްގެ އިނގިލި އަނބުރާލާ ހުޅުން ނައްޓުވާލި ކަމުގެ ތުހުމަތުގައި އެސްކޫލްގައި މަސައްކަތްކުރާ ބިދޭސީ ޓީޗަރެއް ފުލުހުން ހައްޔަރުކޮށްފިއެވެ. މި ހާދިސާ ހިނގާފައިވަނީ މިމަހުގެ 26 ވަނަ ދުވަހު ހެނދުނު 10:50 ގައެވެ.
އެނގިފައިވާ ގޮތުގައި، ދަރިވަރު ގެންގުޅުނު ފެންފުޅިން އޭނާގެ ޓީޗަރުގެ ގައިގައި ޖެހުމުން، ޓީޗަރު ރުޅިއައިސްގެން އެކުއްޖާގެ އިނގިލި ހިފައި އަނބުރާލާފައިވެއެވެ. އިނގިލި އަނބުރާލުމުން ހުޅުން ނައްޓައި، ޓީޗަރު ވަގުތުން އެ ހުޅު އަޅުވައިދިން ނަމަވެސް، ފަހުން އެ ދަރިވަރުގެ އިނގިއްޔަށް ވަރަށް ބޮޑަށް ތަދުވެފައިވެއެވެ.
މި ހާދިސާ ހިނގުމާއެކު އެ ދަރިވަރު ވަނީ އެއަތޮޅު ހޮސްޕިޓަލް ކަމުގައިވާ ކަނޑޫދޫ ހޮސްޕިޓަލަށް ގެންގޮސް ސިއްހީ ފަރުވާ ދީފައެވެ. ދަރިވަރުގެ އިނގިއްޔަށް ލިބުނު ގެއްލުމުގެ ބޮޑުމިނާއި، މިވަގުތު އޭނާގެ ހާލަތު ކިހިނެއްކަން އަދި ސާފެއް ނުވެއެވެ.
މައްސަލަ ހުށަހެޅުމާއެކު ފުލުހުން ވަނީ ތަހުގީގު ފަށާފައެވެ. އިއްޔެ ކޯޓު އަމުރެއްގެ ދަށުން ތުހުމަތުކުރެވޭ ބިދޭސީ ޓީޗަރު ހައްޔަރުކޮށްފައިވާ ކަމަށް ފުލުހުން މަޢުލޫމާތު ދީފައިވެއެވެ. ނަމަވެސް ޓީޗަރު ހައްޔަރުކުރި މުއްދަތާއި، އޭނާ މިހާރު ބަންދުގައި ތިބީ ކޮން ތަނެއްގައިކަން އަދި ހާމަކޮށްފައެއް ނުވެއެވެ.
ސްކޫލް ދަރިވަރަކަށް ޓީޗަރެއްގެ ފަރާތުން މިފަދަ ޖިސްމާނީ އަނިޔާއެއް ލިބުނު މި މައްސަލާއާ ގުޅިގެން އެޑިއުކޭޝަން މިނިސްޓްރީން އަދި އެއްވެސް ބަޔާނެއް ނެރެފައެއް ނުވެއެވެ. އަދި މި ހާދިސާއާ ގުޅިގެން ސްކޫލުން ނުވަތަ މިނިސްޓްރީން އަޅާނެ ފިޔަވަޅުތަކާ ބެހޭގޮތުން ވެސް އަދި މަޢުލޫމާތެއް ހާމަކޮށްފައެއް ނުވެއެވެ.
ކޮމެންޓު ފޮނުވާ