އެޑިޔުކޭޝަން މިނިސްޓްރީން މިއަދު ބުނީ މިދިޔަ ހޯމަ ދުވަހު ތ. ކަނޑޫދޫ ސްކޫލުގައި ބިދޭސީ ޓީޗަރަކު ދަރިވަރެއްގެ އިނގިލި އަނބުރާލި ކަމަށް ބުނެފައިވާ މައްސަލައަކީ ދަރިވަރަކު ޓީޗަރުގެ ގައިގައި ޖެހުމުން ހިނގި ހާދިސާއެއް ކަމަށެވެ.
މި މައްސަލައިގައި ފުލުހުން ބުނީ ޓީޗަރަކު ދަރިވަރެއްގެ އިނގިލި އަނބުރާލައި ހުޅުން ނައްޓާލި ކަމަށް ބުނާ މައްސަލައެއް ރިޕޯޓުކޮށްފައިވާ ކަމަށެވެ. އަނިޔާ ލިބުނު ކުއްޖާއަށް އެ އަތޮޅު ވޭމަންޑޫ ހޮސްޕިޓަލުގައި ފަރުވާ ދީފައިވާ ކަމަށް ވެސް ފުލުހުން ބުންޏެވެ.
އެޑިޔުކޭޝަން މިނިސްޓްރީގެ އޮފިޝަލަކާ ހަވާލާދީ ބައެއް މީޑިއާތަކުން ރިޕޯޓު ކޮށްފައިވާ ގޮތުގައި، ކިޔަވައިދެމުން ދަނިކޮށް އެ ދަރިވަރު ޓީޗަރުގެ ބުރަކަށީގައި ފެން ފުޅިއަކުން ޖަހާފައިވެއެވެ. އޮފިޝަލް ވިދާޅުވި ގޮތުގައި، ދަރިވަރު ޓީޗަރުގެ ބުރަކަށީގައި ޖެހުމުން ޓީޗަރު ކުލިއަކަށް އެނބުރިފައި ދަރިވަރުގެ އިނގިލީގައި ހިފައިފައިވާ ކަމަށެވެ.
މި ހާދިސާއަށް ފަހު ދަރިވަރުގެ ބެލެނިވެރިން ސްކޫލަށް ވަދެ، ދަރިވަރުން ކިޔަވަން ތިއްބައި ހަޑިހުތުރު ބަހުން "ޒުވާބު ކޮށްފައި" ވާ ކަމަށް މިނިސްޓްރީގެ އޮފިޝަލް ވިދާޅުވި އެވެ. އަދި އެ މައްސަލަ ފުލުހުންނަށް ހުށަހެޅުމުގެ މަސައްކަތް ކުރަމުން އަންނަ ކަމަށް ވެސް އޮފިޝަލް ވިދާޅުވި އެވެ.
މި މައްސަލަ މިނިސްޓްރީ އާއި ފުލުހުން ބަލަމުން އަންނައިރު، އައްޑޫ ސްކޫލެއްގައި ޓީޗަރަކު ދަރިވަރެއްގެ ބޮލުގައި ދަގަނޑު ފުޅިއަކުން ޖެހި ކަމަށް ބުނާ މައްސަލައެއް ވެސް މި ފަހުން ފެންމަތިވެފައިވާ ކަމަށް ރިޕޯޓު ކުރެވިފައިވެ އެވެ.
ކޮމެންޓު ފޮނުވާ