އިމިގްރޭޝަން އޮތޯރިޓީން ފަންސާސް މުވައްޒަފުން ހޯދުމަށްޓަކައި "ވޯކް-އިން އިންޓަވިއު" އެއް ބޭއްވުމަށް ނިންމައިފިއެވެ. މި އިންޓަވިއު އޮންނާނީ އަންނަ ހޮނިހިރު ދުވަހު ހެނދުނު 9:00 އިން ހަވީރު 5:00 އަށް ގަލޮޅު ސްކޫލުގައި ކަމަށް ހާމަކޮށްފައިވެއެވެ.
އިމިގްރޭޝަނުން މަޢުލޫމާތު ދެއްވާގޮތުގައި، މި އިންޓަވިއު ކުރިއަށް ގެންދާނީ އެ އިދާރާއިން ކަނޑައަޅާ ތިން މެންބަރުންގެ މައްޗަށް އެކުލެވޭ ޕެނަލަކުންނެވެ. ވަޒީފާއަށް ކުރިމަތިލާ ފަރާތްތަކުގައި ހުންނަންޖެހޭ ޝަރުތުތަކުގެ ތެރޭގައި، އޯލެވެލް ނުވަތަ އެއާ އެއްފެންވަރުގެ އިމްތިހާނެއްގައި ދަށްވެގެން ދެ މާއްދާއިން "ޑީ" ލިބިފައިވުމާއެކު، އޯލެވެލް ނުވަތަ އޭލެވެލްގައި ދިވެހިން ދަށްވެގެން "ސީ" ލިބިފައިވުން، ނުވަތަ އެމްއެންކިއުއެފް ލެވެލް 3 ސެޓްފިކެޓް ފުރިހަމަކޮށްފައިވުން ހިމެނެއެވެ. އަދި މީގެއިތުރުން، އިޢުލާނުގެ މުއްދަތު ހަމަވާ ދުވަހަށް ޢުމުރުން 40 އަހަރަށްވުރެ ދޮށީ މީހަކަށް ނުވުން ޝަރުތުކޮށްފައިވެއެވެ.
"ވޯކް-އިން އިންޓަވިއު" އަކީ ކުރިން ހުށަހެޅުމެއް ނެތި، އެ ތަނަކުން ބުނާ ގަޑިއެއްގައި ދިޔުމުން ކުރާ އިންޓަވިއުއެކެވެ. އިމިގްރޭޝަން އޮތޯރިޓީން މި ވަޒީފާތަކަށް މީހުން ހޯދަން އިޢުލާންކޮށްފައިވަނީ ވެލާނާ އިންޓަނޭޝަނަލް އެއަރޕޯޓުގެ އައު ޓާމިނަލް ހުޅުވުމާ ދިމާކޮށެވެ.
އައު ޓާމިނަލް ނިންމުމަށް ސަރުކާރުން އަމާޒުކޮށްފައިވަނީ އަންނަ އޮކްޓޯބަރު މަހަށެވެ. މިއާއެކު، އެއަރޕޯޓުގެ ޚިދުމަތްތައް ފުޅާކުރުމަށްޓަކައި އިމިގްރޭޝަން އޮފިސަރުންގެ އަދަދު އިތުރުކުރުމަށް އެ އިދާރާއިން ނިންމާފައިވެއެވެ.
ކޮމެންޓު ފޮނުވާ