ދާހިލީ ވުޒާރާއިން މިއަދު ހާމަކުރެއްވި ގޮތުގައި، ބިދޭސީންގެ ފީ ނުދައްކާ ތިބި ވަޒީފާދޭ ފަރާތްތަކުން ނުދައްކާ ހުރި ފައިސާގެ ތެރެއިން 1.6 ބިލިއަން ރުފިޔާ ހޯދިފައިވެއެވެ.
ދައުލަތުގެ މީޑިއާއިން ގެނެސްދިން ޕްރޮގްރާމެއްގައި ވާހަކަފުޅު ދައްކަވަމުން، ދާހިލީ ވުޒާރާގެ ސްޓޭޓް މިނިސްޓަރު އަބްދުލް މަޖީދު އިބްރާހީމް ވިދާޅުވިގޮތުގައި، މި ސަރުކާރުން ވެރިކަމާ ހަވާލުވިއިރު ވަޒީފާދޭ ފަރާތްތަކުން ދައުލަތަށް ދައްކަންޖެހޭ ބިދޭސީންގެ ފީގެ ގޮތުގައި ދައުލަތަށް 1.7 ބިލިއަން ރުފިޔާ ނުލިބި އޮތެވެ. އޭރު ބިދޭސީންގެ ފީ ގަވައިދުން ދައްކަމުން ދިޔައީ 22.72 އިންސައްތަ މީހުން ކަމަށްވެސް މަޖީދު ފާހަގަކުރެއްވިއެވެ.
"މި މައްސަލަ ހައްލުކޮށް، ދައުލަތަށް ނުލިބިވާ ފައިސާ ހޯދުމުގެ މަސައްކަތުގެ ތެރެއިން، ގަވާއިދުން ފީ ނުދައްކާ 1,000 އަށްވުރެ ގިނަ މީހުންގެ ނަން ވެސް އާންމުކުރިން. އަދި ބޮޑެތި އަދަދުތަކުން ބިދޭސީންގެ ފީ ނުދައްކާ މީހުންނަށް ސަރުކާރުން ވަނީ އެ ފައިސާ ދައްކައި ހަލާސްކުރުމަށް އަހަރު ދުވަހުގެ މުއްދަތެއް ވެސް ދީފައި،" މަޖީދު ވިދާޅުވިއެވެ.
ސްޓޭޓް މިނިސްޓަރު މަޖީދު އިތުރަށް ހާމަކުރެއްވިގޮތުގައި، މި ސަރުކާރުން އެޅި ފިޔަވަޅުތަކާއެކު މިހާރު ބިދޭސީންގެ ފީ ދައްކަންޖެހޭ މީހުންގެ ތެރެއިން 55.4 އިންސައްތަ މީހުން ވަނީ ގަވާއިދުން ފީ ދައްކަމުން ގެންދެވޭ ހާލަތަކަށް ބަދަލުވެފައެވެ. އަދި ބިދޭސީންގެ ފީގެ ގޮތުގައި ދައުލަތަށް ނުލިބި އޮތް 1.7 ބިލިއަން ރުފިޔާގެ ތެރެއިން 1.6 ބިލިއަން ރުފިޔާ ހޯދިފައިވާކަމަށްވެސް ވިދާޅުވިއެވެ. މަޖީދު ވިދާޅުވީ މިއީ ސަރުކާރަށް ލިބުނު ބޮޑު ކާމިޔާބީއެއް ކަމަށެވެ.
ކޮމެންޓު ފޮނުވާ