ހައުސިންގ ޑެވެލޮޕްމަންޓް ކޯޕަރޭޝަން (އެޗްޑީސީ) އިން މިއަދު ހާމަކުރިގޮތުގައި، ސަލަފް ޖަމިއްޔާއާ ގުޅިގެން ހުޅުމާލެ ހޮސްޕިޓަލުގައި ފަރުވާ ހޯދާ ބަލިމީހުންނާއި އެމީހުންގެ އެހީތެރިންނަށް، އަދި ސިއްހީ ދާއިރާގެ މުވައްޒަފުންނަށް ރަމަޟާން މަހު އިފްތާރު ޕެކް ފޯރުކޮށްދިނުމުގެ މަސައްކަތް ފަށައިފިއެވެ.
މިހަވާދިސްގައި އެޗްޑީސީއިން ބުނާގޮތުގައި، "ހަދާޔާ" މި ނަމުގައި ކުރިއަށްގެންދާ މި ޚާއްސަ ޕްރޮގްރާމްގެ ދަށުން، ރޯދަ މަހުގެ ކޮންމެ ދުވަހަކު ހޮސްޕިޓަލުގައި ތިބޭ ބަލިމީހުންނާއި، އެހީތެރިންނަށާއި، ސިއްހީ ދާއިރާގެ މަސައްކަތްތެރިންނަށް އިފްތާރު ޕެކް ފޯރުކޮށްދެވޭނެއެވެ.
މި ޚާއްސަ އިފްތާރު ޕެކްތައް ތައްޔާރުކުރުމަށްޓަކައި އެޗްޑީސީއާއި ސަލަފް ޖަމިއްޔާއާ ދެމެދު އެއްބަސްވުމެއްގައި ސޮއިކޮށްފައިވާއިރު، މި ޕެކްތައް ތައްޔާރުކުރުމަށް ބޭނުންވާ ތަނެއްވެސް އެޗްޑީސީއިން ހަމަޖައްސައިދީފައިވާކަމަށް އެކުންފުނިން ފާހަގަކޮށްފައިވެއެވެ.
އެޗްޑީސީއިން އިތުރަށް ހާމަކުރިގޮތުގައި، މި މަސައްކަތަކީ ރޯދަމަހުގެ މާތް ދުވަސްވަރުގައި ބަލިމީހުންނަށް އެހީތެރިވެ، އިސްލާމީ ރިވެތި އުސޫލުތަކުގެ މަތިން އެކަކު އަނެކާއަށް ހަދިޔާދިނުމުގެ ރޫހް އާލާކުރުމަށް ކުރިއަށްގެންދާ ޕްރޮގްރާމެކެވެ. އަދި މީގެ އިތުރުން، ބަލިމީހުންނަށް ޚިދުމަތްދިނުމުގައި ވަރުބަލިކަމެއްނެތި މަސައްކަތްކުރާ ސިއްހީ ދާއިރާގެ މުވައްޒަފުންގެ އަގުވަޒަންކުރުމުގެ ގޮތުންވެސް ކުރިއަށްގެންދާ ހަރަކާތެއްކަމަށް އެޗްޑީސީއިން ބުނެފައިވެއެވެ.
ކޮމެންޓު ފޮނުވާ