"ހުވަން" ލޯންޗް ހާދިސާގައި 48 މީހުން ސަލާމަތްކުރު ފުލުހުންނަަށް ސީޕީގެ ޝުކުރު އަލީ ޝުޖާޢު ޝުކުރު އަދާ ކޮށްފިއެވެ.
މިއަދު ހެނދުނު މަހިބަދޫ އާއި ދިގުރަށާ ދެމެދު ދަތުރުކުރަމުން ދިޔަ "ހުވަން" ނަމަކަށް ކިޔާ ލޯންޗެއް ދިޔަވެ އަޑިއަށް ދިއުމުގެ ސަބަބުން ކުއްލި ހާލަތެއް ދިމާވެ، އެ ހާދިސާގައި 45 ފަސިންޖަރުންނާއި 3 ފަޅުވެރިން ސަލާމަތްކުރުމަށް ފުލުހުން ހިންގި އަވަސް އޮޕަރޭޝަން ކާމިޔާބުކަމާއެކު ނިންމާލިއެވެ.
ދިގުރަށުން މާލެއަށް ދަތުރުކުރަމުންދިޔަ މި ލޯންޗް އަޑިއަށް ދިޔަކަމުގެ ރިޕޯޓް ފުލުހުންނަށް ލިބިފައިވަނީ މިއަދު ހެނދުނު 07:57 ގައެވެ. ވަގުތުން ފުލުހުން ހަރަކާތްތެރިވެ، މީހުން ސަލާމަތްކުރުމުގެ އޮޕަރޭޝަނެއް ފެށިއެވެ.
އޮޕަރޭޝަން ކާމިޔާބުވުމާ ގުޅިގެން ކޮމިޝަނަރ އޮފް ޕޮލިސް އަލީ ޝުޖާޢު، ވަނީ ފޯނުގެ ޒަރިއްޔާއިން އޮޕަރޭޝަނުގައި ބައިވެރިވި ފުލުހުންނަށް ޝުކުރު އަދާކުރައްވާފައެވެ. ޑެޕިއުޓީ ކޮމިޝަނަރުންކަމުގައިވާ އިސްމާޢީލް ނަވީން އަދި ފަރުހާދު ފިކުރީ ވެސް މި ފޯނު ކޯލުގައި ބައިވެރިވެ، ފުލުސް އޮފިސަރުންގެ އަވަސް އަދި ހަރުދަނާ މަސައްކަތަށް ތައުރީފުކުރެއްވިއެވެ.
ކޮމިޝަނަރ ޝުޖާޢު، ޚާއްޞަކޮށް ރަމަޟާން މަހުގެ ދުވަހެއްގެ ހެނދުނުގެ ވަގުތުގައި މި މަސައްކަތް ކުރިއަށް ގެންދިއުމުގައި އޮފިސަރުން ދެއްކެވި ނަމޫނާއަށް ޝުކުރު އަދާކުރައްވައި އެ މަސައްކަތާމެދު ފަޚުރުވެރިވާކަމަށް ވިދާޅުވިއެވެ. އޭނާ އިތުރަށް ވިދާޅުވީ މީހުންގެ ފުރާނަ ސަލާމަތްކުރުމަށް ކުރި މަސައްކަތުގެ މުހިންމުކަން ފާހަގަކުރައްވައި، ސަލާމަތްކުރުމުގެ މަސައްކަތް ވިލަރެސްކުރުމުގައި ކޮށްފައިވާ މަސައްކަތް ޚާއްޞަކޮށް ފާހަގަކުރަންޖެހޭ ކަމަށެވެ.
ޑެޕިއުޓީ ކޮމިޝަނަރ ފަރުހާދު ފިކުރީ ވިދާޅުވީ އޮޕަރޭޝަންގައި ބައިވެރިވި ފުލުހުންގެ އަވަސް ނިންމުންތަކަކީ އެފަރާތްތަކުގެ ތައްޔާރީ އަދި އިޚްލާޞްތެރި މަސައްކަތުގެ ހެއްކެއްކަމުގައެވެ. ޑެޕިއުޓީ ކޮމިޝަނަރ އިސްމާޢީލް ނަވީން ފާހަގަކުރެއްވީ، 4 ކުޑަކުދިން ހިމެނޭ ގޮތަށް އުޅަނދުގައި ތިބި 48 މީހުން ރައްކާތެރިކަމާއެކު ސަލާމަތްކުރެވުނު މި އޮޕަރޭޝަންގެ ކޯޑިނޭޝަން ވަރަށް ރަނގަޅަށް ކުރިއަށް ގޮސްފައިވާކަމެވެ.
މި އޮޕަރޭޝަންގައި އާންމު ރައްޔިތުންގެ ދައުރު ވެސް ވަރަށް މުހިންމު ކަމަށް ފާހަގަކުރެވުނެވެ. މީހުން ދިގުރަށަށް އަނބުރާ ގެންދިއުމުގައި އެހީތެރިވި ލޯންޗެއްގެ ވެރިފަރާތަށް ރީޖަން ކޮމާންޑަރ ޝުކުރު އަދާކުރެއްވިއެވެ.
މި ހާދިސާގެ ތަޙްޤީޤެއް ދިވެހި ފުލުހުންގެ ޚިދުމަތުން ވަނީ ފަށާފައެވެ.
ކޮމެންޓު ފޮނުވާ