ޗައިނާއާއެކު ވެފައިވާ މިނިވަން ވިޔަފާރީގެ އެއްބަސްވުމާއި އިމްޕޯޓް ޑިއުޓީން ލިބޭ އާމްދަނީ ދަށަށް ގޮސްފައިވުމާ ދެމެދު ގުޅުމެއް ނެތް ކަމަށް އިޤްތިޞާދީ ވަޒީރު މުޙައްމަދު ސަޢީދު ހޮނިހިރު ދުވަހު ވިދާޅުވެއްޖެއެވެ.
މިނިސްޓްރީ އޮފް ފިނޭންސްއިން އެންމެ ފަހުން ނެރުނު ހަފްތާގެ މާލީ ރިޕޯޓުގައިވާ ގޮތުން ފެބްރުއަރީ 6 ގެ ނިޔަލަށް އިމްޕޯޓް ޑިއުޓީގެ ގޮތުގައި ދައުލަތަށް 138 މިލިއަން ރުފިޔާ ލިބިފައިވެއެވެ. މިއީ މިދިޔަ އަހަރުގެ މި މުއްދަތުގައި ލިބުނު 385 މިލިއަން ރުފިޔާއާ އަޅާބަލާއިރު 64 އިންސައްތައިގެ ދަށްވުމެކެވެ.
މިކަމުގެ ސަބަބުން ޗައިނާއާއެކު ވެފައިވާ އެފްޓީއޭ – މިއަހަރު ފެށުނީއްސުރެ ޢަމަލުކުރަން ފެށުނު – އިން މިކަމަށް އަސަރުކޮށްފައިވޭތޯ ސުވާލު އުފެދުނެވެ.
ހޮނިހިރު ރޭ ބޭއްވުނު 'އަހާ' ފޯރަމްގައި ސަޢީދާ ސުވާލުކުރެވުނީ ޗައިނާއާއެކު ވެފައިވާ އެފްޓީއޭގެ ފައިދާތަކާ ބެހޭގޮތުންނެވެ.
މި ސުވާލަށް ޖަވާބުދެއްވަމުން ސަޢީދު ވިދާޅުވީ "ބައެއް ބޭފުޅުން އިމްޕޯޓް ޑިއުޓީއަށް އައި ބަދަލުތައް އެފްޓީއޭއާ ގުޅުވަން މަސައްކަތް ކުރައްވާ" ކަމަށެވެ.
އެފްޓީއޭ އަށް ޢަމަލުކުރަން ފެށުނީއްސުރެ ޗައިނާއިން 1 ބިލިއަން ރުފިޔާއަށްވުރެ ގިނަ އަގުގެ މުދާ އިމްޕޯޓްކޮށްފައިވާ ކަމަށް އެމަނިކުފާނު ވިދާޅުވިއެވެ.
"އެހެންވީމާ މިކަމާއި އެފްޓީއޭއާ ދެމެދު ގުޅުމެއް ނެތް. މި ދަށްވުމާއި އެކަމާ ދެމެދު ގުޅުމެއް ނެތް،" ސަޢީދު ވިދާޅުވިއެވެ.
"ރާއްޖެއަށް ބޭނުންވާ މުދާ އިމްޕޯޓްކުރުމަށް ވިޔަފާރިވެރިންނަށް މަގުފަހިކޮށްދިނުމަކީ ފައިދާހުރި ކަމެއް. އަދި އެއީ މި މުދާ ބޭނުންކުރާ ރައްޔިތުންނަށްވެސް ފައިދާހުރި ކަމެއް… މަތީ ޓެރިފް ރޭޓްތަކެއް ނެގުމަކީ ނޫން."
ވިޔަފާރި ފަސޭހަކޮށްދީ ރައްޔިތުންނަށް އަތްފޯރާފަށުގައި މުދާ ލިބޭނެ މަގު ތަނަވަސްކޮށްދިނުމަކީ ރައީސް ޑރ. މުޙައްމަދު މުޢިއްޒުގެ އެންމެ އިސް އަމާޒުތަކުގެ ތެރެއިން އެއް އަމާޒު ކަމަށް ސަޢީދު ވިދާޅުވިއެވެ.
