ޓުއަރިޒަމް މިނިސްޓަރުކަމުން ފައިސަލް ވަކިކުރެއްވުމާމެދު އެއްވެސް ހަމްދަރުދީއެއް ނެތް ކަމުގައި ކުރީގެ ރައީސް ޔާމީން ވިދާޅުވެއްޖެއެވެ.
މި މައްސަލައާ ގުޅިގެން ޕީއެންއެފްގެ ފްރޮންޓް އޮފީހުގެ ޖަލްސާގައި ރޭ ވާހަކަފުޅު ދައްކަވަމުން، ކުރީގެ ރައީސް ޔާމީން ވިދާޅުވެފައިވަނީ މިހާރު ދިމާވެފައިވަނީ "ބައި އެޅުމުގެ މައްސަލައެއް" ކަމަށެވެ. އަދި ކޮންމެ މީހަކުވެސް ކުރާ ކަންތައްތަކުގެ ނަތީޖާ އެމީހަކާ ބައްދަލުވާނެ ކަމަށް ވިދާޅުވިއެވެ. އެގޮތުން ފައިސަލް މަޤާމުން ވަކިކުރެއްވުމާއި އަބްދުއްރަހީމް ގޭގައި ހުންނެވުމާ މެދު އެއްވެސް ހަމްދަރުދީއެއް ނެތް ކަމަށް ވިދާޅުވިއެވެ.
މީގެއިތުރުން، އެޗްޑީސީގެ ކުރީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދާއި ފެނަކަ ކޯޕަރޭޝަންގެ ކުރީގެ މެނޭޖިން ޑިރެކްޓަރު މުއާޒް މުހައްމަދު ރަޝީދުގެ މައްސަލަ ވެސް ތަޙުޤީޤު ނުކުރެވޭނެ ކަމަށް ޔާމީން ވިދާޅުވެފައިވެއެވެ. ފުލުހުން ތަޙުޤީޤު ފަށައިފިނަމަ އެ ބޭފުޅުންގެ ފަރާތުން ދައްކާނެ ވާހަކަތަކެއް ހުންނާނެ ކަމަށް ވެސް ފާހަގަކުރެއްވިއެވެ.
ފާހަގަކޮށްލެވޭ ކަމަކީ، ފައިސަލް މަޤާމުން ވަކިކުރެއްވި އިރު، އެމަނިކުފާނުގެ ބައްޕާފުޅު އަބްދުއްރަހީމް ހުންނެވީ މެލޭޝިއާގައެވެ. އަބްދުއްރަހީމް ރާއްޖެ ވަޑައިގެންނެވި ފަހުން ވެސް މި މައްސަލައާ ގުޅޭގޮތުން އެއްވެސް އެއްޗެއް ވިދާޅުވެފައެއް ނުވެއެވެ. އަބްދުއްރަހީމްއަކީ ރައީސް މުއިއްޒުގެ އެންމެ ގާތް އެއް އެހީތެރިޔާކަން ވެސް ފާހަގަކޮށްލެވެއެވެ.
ޓޫރިޒަމް މިނިސްޓަރުގެ މަޤާމުގައި ހުންނެވި އިބްރާހިމް ފައިސަލް ވަކިކުރެވުނީ މިދިޔަ އަންގާރަ ދުވަހުއެވެ. ނަމަވެސް ފައިސަލް މަޤާމުން ވަކިކުރެއްވި ސަބަބެއް ރައީސް އޮފީހުން އަދި ހާމަކުރައްވާފައެއް ނުވެއެވެ.
