މިހާރު ކުރިޔަށް ދަނީ މުލީ އެއަރޕޯޓުގެ އިމާރާތްތަކުގެ ފިނިޝިންގ މަސައްކަތްތައް އެމްޓީސީސީން ހާމަކުރި ކޮށްފިއެވެ. އަދި އެއަރޕޯޓްގެ ރަންވޭ ވަށައިގެން ހިއްކަންޖެހޭ ސަރަހައްދު ހިއްކުމުގެ މަސައްކަތްވެސް ނިމުމަކާ ވަރަށް ކައިރިވެފައިވެއެވެ.
ރާއްޖޭގައި އެއަރޕޯޓެއް ނެތް މަދު އަތޮޅުތަކުގެ ތެރެއިން އެއް އަތޮޅަކީ މުލަކަތޮޅެވެ. މުލީގައި އެއަރޕޯޓް އިމާރާތްކުރުމުގެ މަސައްކަތް ފެށިފައިވަނީ 2022 ވަނަ އަހަރުގެ ކުރީކޮޅުގައެވެ. މި މަޝްރޫޢުގެ މަސައްކަތް ހަވާލުކުރެވިފައިވަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އާއެވެ.
ޕީއެސްއެމް ނިއުސްއަށް އެމްޓީސީސީން މަޢުލޫމާތު ދެއްވިގޮތުގައި، މުޅި އެއަރޕޯޓްގެ އިމާރާތްކުރުމުގެ 85 އިންސައްތަ މަސައްކަތް ވަނީ ނިމިފައެވެ. މިވަގުތު ކުރިއަށްދަނީ ޓަރމިނަލްއާއި އެހެނިހެން އިމާރާތްތަކުގެ ފިނިޝިންގ މަސައްކަތްތަކެވެ. އެއަރޕޯޓްގެ ރަންވޭގެ ހުރިހާ މަސައްކަތެއްވެސް މިހާރު ވަނީ ނިމިފައެވެ.
އެމްޓީސީސީން އިތުރަށް ފާހަގަކުރެއްވި ގޮތުގައި މިވަގުތު އެންމެ އިސްކަމެއް ދެވިގެން ކުރިއަށްދަނީ ޓަރމިނަލަށް ބޭނުންވާ ސާމާނު ހޯދުމުގެ މަސައްކަތެވެ. ރަންވޭ ވަށައިގެން ހިއްކަންޖެހޭ ސަރަހައްދުގެ ބޮޑު ހިލައިގެ ރިވެޓްމަންޓްގެ މަސައްކަތް ނިންމައި، ވެލި އެޅުމުގެ މަސައްކަތްވެސް ދަނީ ކުރެވެމުންނެވެ. މިހާތަނަށް ބިން ހިއްކުމުގެ 90 އިންސައްތަ މަސައްކަތް ވަނީ ނިމިފައެވެ.
ރީޖަނަލް އެއަރޕޯޓްސްއިން ބުނާ ގޮތުގައި ކުރިއަށް އޮތް 2 މަސްދުވަހުގެ ތެރޭގައި މަސައްކަތްތައް ނިންމައި، ރަންވޭގެ ޓެސްޓް ފްލައިޓް ބޭއްވުމަށް ވަނީ ރޭވިފައެވެ. މި އެއަރޕޯޓަކީ އެތެރޭގެ އުދުހުންތަކަށް ޚާއްޞަކުރެވިގެން ތަރައްޤީކުރެވޭ އެއަރޕޯޓެކެވެ. 1200 މީޓަރު ދިގު އަދި 30 މީޓަރު ފުޅާ ރަންވޭއެއް މި އެއަރޕޯޓުގައި ހިމެނެއެވެ. މި މަޝްރޫޢުއަށް ސަރުކާރުން 221 މިލިއަން ރުފިޔާ ޚަރަދުކުރެއެވެ. މުލަކަތޮޅުގައި މީހުން ދިރިއުޅޭ 8 ރަށް އޮވެއެވެ. އަދި މުޅި އަތޮޅުގެ އާބާދީއަކީ 8000 އަށްވުރެ މަދު އަދަދެކެވެ.
ކޮމެންޓު ފޮނުވާ