މާލޭ ސިޓީ ކައުންސިލުން ރަމަޟާން މަހަށް ޚާއްޞަކޮށްގެން މާލެ ސަރަހައްދުގެ މިސްކިތްތައް މަރާމާތުކުރުމުގެ މަޝްރޫޢެއް ފަށައިފިއެވެ. މި މަޝްރޫޢުގެ ދަށުން މާލެ އާއި ހުޅުމާލޭގެ މިސްކިތްތައް މަރާމާތުކޮށް ޒީނަތްތެރިކުރުމުގެ މަސައްކަތް ދަނީ ކުރެވެމުންނެވެ.
ހުޅުމާލޭގެ މަސްޖިދުލް އަޒީޒާ މޫސާ މިސްކިތުގައި ކަތުރު ފަނި އަޅާފައިވާ މިމްބަރު ވަނީ އައު މިމްބަރަކަށް ބަދަލުކޮށް ނިމިފައެވެ. އަދި ހުޅުމާލޭގައި އެންމެ ފުރަތަމަ ޢިމާރާތްކުރެވުނު މިސްކިތްކަމުގައިވާ މަސްޖިދުލް އަމާނީ މަރާމާތުކޮށް ސާފުކުރުމުގެ މަސައްކަތްވެސް ދަނީ ކުރިއަށެވެ. މީގެއިތުރުން، ހުޅުމާލޭ އަލްސާނީ މިސްކިތް ޒީނަތްތެރިކުރުމުގެ ގޮތުން ގަސް އިންދުމުގެ މަސައްކަތްވެސް ކައުންސިލުން ދަނީ ކުރަމުންނެވެ.
މަސްޖިދުލް ހައްތާބުގެ ފާޚާނާތަކުގެ ދޮރުތަކާއި ޓައިލްސް ބަދަލުކޮށް، ވުޟޫކުރާ ސަރަހައްދު މަރާމާތުކުރުމުގެ މަސައްކަތް ވަނީ ނިމިފައެވެ. އަދި މަސްޖިދުލް ތަޤްވާގެ ޒީނަތްތެރިކުރުމާއި، ނަމާދުކުރާ ސަރަހައްދު ފުޅާކުރުމުގެ އިތުރުން އިތުރު ފާޚާނާއެއް އިމާރާތްކުރުމަށް ކައުންސިލުން ވަނީ ނިންމާފައެވެ. ފުރުޤާން މިސްކިތަށް އަމިއްލަ ފަރާތަކުން އޭސީ ހަރުކޮށްދިނުމަށް ނިންމާފައިވާކަމަށާއި، މި މަސައްކަތްވެސް ރަމަޟާން މަސް ފެށުމުގެ ކުރިން ނިންމާލެވޭނެކަމަށް ކައުންސިލުން މަޢުލޫމާތު ދެއެވެ.
މިސްކިތްތަކުގެ މަރާމާތުގެ މަސައްކަތުގެ އިތުރުން، މާލޭގެ މަގުތަކުގައި ހިނގާބިނގާވެ އުޅޭ މީހުންނަށް ދަތިވާގޮތަށް ބަހައްޓާފައި ހުރި ޕެލެޓްތައް ނެގުމުގެ މަސައްކަތްވެސް ކައުންސިލުން ދަނީ ކުރިއަށް ގެންދަމުންނެވެ. މިއަހަރުގެ ރަމަޟާން މަހުގެ ފުރަތަމަ ދުވަސް ކަމަށް ކަލަންޑަރުގައި ވަނީ މާރިޗު 1 ވަނަ ދުވަސް ކަނޑައެޅިފައެވެ.
