ބޭންކް އޮފް މޯލްޑިވްސް (ބީއެމްއެލް) އާއި އަނގޮޅިތީމު ކައުންސިލާ ދެމެދު އެރަށުގައި އޭޓީއެމްއެއް ގާއިމުކުރުމަށް އެއްބަސްވުމެއްގައި ސޮއިކޮށްފިއެވެ. ރައީސުލްޖުމްހޫރިއްޔާ މާޅޮސްމަޑުލު އުތުރުބުރީގެ ބައެއް ރަށްތަކަށް ކުރެއްވި ދަތުރުފުޅުގައި އަނގޮޅިތީމުގެ ރައްޔިތުންނާ ބައްދަލުކުރެއްވުމަށް ބޭއްވި ޖަލްސާގައި މި އެއްބަސްވުމުގައި ބީއެމްއެލްގެ ފަރާތުން ބަދުރުއްދީން ޙަސަން އަދި ކައުންސިލްގެ ފަރާތުން ފައިޞަލް ނަސީމް ސޮއިކުރެއްވިއެވެ.
ބީއެމްއެލްއިން ހާމަކުރި ގޮތުގައި މިއީ މުޅި ރާއްޖެއަށް އޭޓީއެމް ޚިދުމަތް ފޯރުކޮށްދިނުމުގެ މަޝްރޫޢުގެ ތެރެއިން ކުރިއަށްގެންދާ މަސައްކަތެކެވެ. މިވަގުތު ރާއްޖޭގެ 90 ރަށެއްގައި 150 އޭޓީއެމް ޤާއިމުކުރެވިފައިވާއިރު، އިތުރު 17 ރަށަކަށް އޭޓީއެމް ގެނައުމުގެ މަސައްކަތް ކުރިއަށްދާކަމަށް ބޭންކުން ބުނެފައިވެއެވެ. މިއަހަރުގެ ނިޔަލަށް ރާއްޖޭގެ ހުރިހާ ރަށެއްގައި އޭޓީއެމްގެ ޚިދުމަތް ފޯރުކޮށްދިނުމަކީ ބީއެމްއެލްގެ އަމާޒެކެވެ.
އަނގޮޅިތީމުގައި އޭޓީއެމްއެއް ޤާއިމުކުރުމަށް ސޮއިކުރެވުނު އެއްބަސްވުމާއެކު، ގާތް މުސްތަޤުބަލެއްގައި އެރަށުގެ ރައްޔިތުންނަށް މި ޚިދުމަތް ލިބިގެންދާނެއެވެ. މިއީ ރަށުގެ ރައްޔިތުންނަށް ލިބިގެންދާނެ ވަރަށް ބޮޑު ލުއިފަސޭހައެއްކަމަށް އެރަށުގެ ރައްޔިތުން ފާހަގަކޮށްފައިވެއެވެ. މި މަޝްރޫޢުގެ ސަބަބުން ރަށްރަށުގެ ރައްޔިތުންނަށް ފަސޭހަކަމާއެކު ބޭންކިންގ ޚިދުމަތްތައް ލިބިގެންދާނެކަމަށް ބެލެވެއެވެ.
