މިނިސްޓަރ އޮފް ޔޫތު އެމްޕަވަރމަންޓް، އިންފޮމޭޝަން އެންޑް އާރޓްސް، އިބްރާހިމް ވަހީދު އިއްޔެ ހަވީރު ޒުވާނުންގެ އިތުރުވެހި (ކުރީގެ މުލިއާގެ ވެހިކަލް ގަރާޖު) ގައި މާލޭގެ މަދަނީ ޖަމްއިއްޔާތަކާ ބައްދަލުކުރައްވައިފިއެވެ. މި ބައްދަލުވުމުގައި 100 އަށްވުރެ ގިނަ މަދަނީ ޖަމްއިއްޔާތަކުން ބައިވެރިވެފައިވެއެވެ.
މަދަނީ ޖަމްއިއްޔާތަކުން ހިންގާ މުޖުތަމައު ބާރުވެރިކުރުމުގެ މަޝްރޫއުތަކާއި ހަރަކާތްތައް ހިންގުމަށް ފައިސާގެ އެހީ ދިނުމަށް ސަރުކާރުން ނިންމި ނިންމުން އިއުލާނުކުރީ މިދިޔަ އަހަރުގެ މެއި މަހުގައެވެ. މި ފިޔަވަހީގެ ދަށުން ކުދި، މެދު އަދި ބޮޑެތި މަޝްރޫއުތަކާއި ހަރަކާތްތައް ހިންގުމަށް އެހީތެރިކަން ފޯރުކޮށްދިނުމަށް ވަނީ ހަމަޖެހިފައެވެ.
މި އެހީގެ މައިގަނޑު މަޤްޞަދަކީ މުޖުތަމައު ބާރުވެރިކުރުމަށް މަދަނީ ޖަމްއިއްޔާތަކުން ކުރަމުންދާ މަސައްކަތްތައް ފާހަގަކޮށް، އެފަދަ މަސައްކަތްތަކަށް އެއްބާރުލުންދީ އެހީތެރިކަން ފޯރުކޮށްދިނުމާއެކު ޤައުމީ ތަރައްޤީގައި މަދަނީ ޖަމްއިއްޔާތަކުގެ ދައުރު ފުޅާކުރުމެވެ.
ބައްދަލުވުމުގައި މަދަނީ ޖަމްއިއްޔާތަކުން ފާހަގަކުރި އެންމެ މުހިންމު ކަމަކީ ޕްރޮގްރާމްތައް ހިންގުމަށް ޖާގައިގެ ދަތިކަން ހުރިކަމެވެ. މިކަމާ ގުޅިގެން މިނިސްޓަރ ވިދާޅުވެފައިވަނީ ޒުވާނުންގެ އިތުރުވެހީގެ މަސައްކަތް ނިމުމުން މި މައްސަލައަށް ހައްލެއް ލިބިގެންދާނެ ކަމަށެވެ.
ކޮމެންޓު ފޮނުވާ