ވިލުފުށީ މަސްޖިދުލް ޢުމަރު ފާރޫގު މިސްކިތާ ބެހޭ ގޮތުން އެ ރަށު ކައުންސިލުން މިއަދު ވީޑިއޯ ރިޕޯޓެއް ނެރެފިއެވެ. މި ރިޕޯޓުގައި ފާހަގަކޮށްފައިވަނީ މި މިސްކިތަކީ ހަމައެކަނި ނަމާދުކުރުމުގެ ބޭނުމަށް އެކަނި ބޭނުންކުރާ މިސްކިތެއް ނޫންކަމެވެ. އަދި މިއީ 2021 ވަނަ އަހަރު ނަލަހިޔާ އިސްލާމީ މަރުކަޒުގެ ނަމުގައި ރަޖިސްޓަރީ ކުރެވި، ސަރުކާރުން ރާއްޖޭގެ އެކި ކަންކޮޅުތަކުގައި ގާއިމްކުރަމުންދާ އިސްލާމީ މަރުކަޒުތަކުގެ ފެންވަރަށް އިމާރާތްކޮށްފައިވާ މިސްކިތެއްކަމަށްވެސް މި ރިޕޯޓުގައި ބުނެފައި ވެއެވެ.
ރިޕޯޓުގައި ވާގޮތުން، މި މިސްކިތުގެ ނަލަ މާލަމަކީ މިސްކިތުގެ އެންމެ ދެކުނުން ގްރައުންޑް ފްލޯގައި ހުންނަ ވަކި ބައެކެވެ. މިއީ މިހާރު ނަމާދުކުރުމަށް ބޭނުންކުރާ ހޯލެއް ނޫނެވެ. ނަމަވެސް މީގެ ކުރިން މިއީ އަންހެނުން ނަމާދުކުރުމަށް ބޭނުންކުރި ހޯލެކެވެ. މިހާރު އަންހެނުން ނަމާދުކުރާ ބައި ހުންނަނީ މިސްކިތުގެ ފުރަތަމަ ފްލޯގައި ޕާޓިޝަން ޖަހައި ވަކިކުރެވިފައެވެ.
މިސްކިތުގެ އެންމެ އުތުރުން ގްރައުންޑް ފްލޯގައި ދެ ކްލާސްރޫމް ގާއިމުކޮށްފައިވެއެވެ. މި ކްލާސްރޫމްތަކުގައި މިހާރު ދަނީ ޤުރުއާން ކްލާސްތައް ހިންގަމުންނެވެ. އަދި މިސްކިތުގެ ހަރިންމަ ތެރޭގައި ވަކިން އެކޮމޮޑޭޝަން ބްލޮކެއް އިމާރާތްކޮށް، މަރުކަޒުގެ މުދައްރިސުން އެތަނުގައި ދިރިއުޅެމުން އަންނައެވެ.
ރިޕޯޓުގައި ވާގޮތުން މިދިޔަ އަހަރުގެ އޮކްޓޫބަރު 6 ވަނަ ދުވަހު މުދައްރިސުންގެ ދުވަސް ފާހަގަކުރުމުގެ ގޮތުން ނަލަ މާލަމުގައި ޓީމް ބިލްޑިންގ ހަރަކާތެއް ކުރިއަށް ގެންދެވުނެވެ. މި ހަރަކާތުގެ ވީޑިއޯއެއް ސޯޝަލް މީޑިއާގައި ދައުރުވަމުންދާތީ، ކައުންސިލުން ވަނީ މިއީ މިސްކިތުގެ ނަމާދުކުރާ ބައިގައި ކުރިއަށްގެންދިޔަ ހަރަކާތެއް ނޫންކަން ސާފުކޮށްދީފައެވެ.
ނަލަ މާލަމަކީ މީގެ ކުރިން ވެސް ދީނީ އަދި އިޖުތިމާއީ އެތައް ޖަލްސާތަކާއި ސެމިނަރތަކެއް ކުރިއަށް ގެންދިޔަ މާލަމެކެވެ. މީގެ ތެރޭގައި އަތޮޅު ފެންވަރުގެ މުބާރާތްތަކާއި، ސަރުކާރުގެ ބޮޑެތި ރަސްމިއްޔާތުތަކާއި، ރައްޔިތުންގެ ބައްދަލުވުންތަކާއި، ކުޅިވަރު މުބާރާތްތަކުގެ ބައްދަލުވުންތައް ހިމެނެއެވެ. އަދި މާލެ އާއި ރާއްޖޭގެ އެކި ރަށްރަށުގައި ހުރި މިފަދަ އިސްލާމީ މަރުކަޒުތަކުގައި ހަދާފައިވާ ހޯލުތައް ވެސް މިފަދަ ބޭނުންތަކަށް ބޭނުންކުރަމުން ގެންދެއެވެ.
