ރާއްޖޭގެ އަވަށްޓެރި ގައުމުތަކަކީ އެންމެ ގާތް ރަހުމަތްތެރިން ކަމުގައި ވީނަމަވެސް، ރާއްޖޭގެ މިނިވަންކަމާއި އިސްތިގުލާލަށް އުނިކަމެއް ނާންނާނެ ގޮތަށް ހުރިހާ ގައުމުތަކާއެކު ގުޅުން ބަދަހިކޮށް، ދިވެހިންނަށް މަންފާކުރާނެ ހުރިހާ މަގެއް ތަނަވަސްކުރައްވާނެ ކަމުގައި ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
އެސްޓޯނިއާއަށް ކުރެއްވި ރަސްމީ ދަތުރުފުޅު ނިންމަވާލެއްވުމުގެ ކުރިން ޕީއެސްއެމަށް ދެއްވި އިންޓަވިއުގައި ރައީސް އިތުރަށް ވިދާޅުވީ، ވެރިކަމާ ހަވާލުވެވަޑައިގެންނެވި ފުރަތަމަ ދުވަހުން ފެށިގެން ވިދާޅުވަމުން ގެންދަވާ ފަދައިން، މި ސަރުކާރުގެ ހާރިޖީ ސިޔާސަތަކީ ރާއްޖޭގެ މަސްލަހަތު ހިމާޔަތްކޮށް، ދިވެހިންނަށް އިސްކަންދޭ ސިޔާސަތެއް ކަމުގައެވެ.
ރައީސް މުއިއްޒު އިތުރަށް ވިދާޅުވެފައިވަނީ، އެސްޓޯނިއާއަށް ކުރެއްވި މި ދަތުރުފުޅަކީ ރާއްޖެ ޑިޖިޓަލައިޒް ކުރުމަށް ސަރުކާރުން ގެންގުޅުއްވާ ތަސައްވުރު ހާސިލުކުރެއްވުމަށް ވަރަށް ކާމިޔާބު ދަތުރުފުޅެއް ކަމަށެވެ. އެސްޓޯނިއާއަކީ ޑިޖިޓަލް އިގްތިސާދެއް ބިނާކުރުމުގައި މުޅި ދުނިޔޭގައިވެސް ނަމޫނާ ގައުމެއްކަން ފާހަގަކުރައްވައި، ރާއްޖޭގެ އާންމު ޚިދުމަތްތައް ޑިޖިޓަލައިޒް ކުރުމަށް ފަށާފައިވާ މަސައްކަތުގައި އެސްޓޯނިއާގެ އެހީތެރިކަމާއި އެއްބާރުލުން ލިބޭނެކަމުގެ ޔަގީންކަން މި ދަތުރުފުޅުން ލިބިވަޑައިގެންފައިވާ ކަމަށް ވިދާޅުވިއެވެ.
ރައީސް އިތުރަށް ވިދާޅުވެފައިވަނީ ސަރުކާރުގެ އަމާޒަކީ ޕަބްލިކް ސަރވިސްތައް 100 ޕަސެންޓް ޑިޖިޓަލައިޒް ކުރުމާއި، ޒަމާނުއްސުރެ ކަރުދާހުން އާކައިވްކޮށްފައި ހުރި ލިޔެކިޔުންތައް ޑިޖިޓަލް އާކައިވްއަކަށް ބަދަލުކުރުން ކަމަށެވެ. އެހެންކަމުން، މި އަމާޒަށް ވާސިލުވުމަށް، އެކަން ކާމިޔާބުކަމާއެކު ކުރަމުންދާ އެސްޓޯނިއާ ފަދަ ގައުމެއްގެ އެހީތެރިކަން ލިބުމަކީ ވަރަށް ބޮޑު ކުރިއެރުމެއްގެ ގޮތުގައި ރައީސް ފާހަގަކުރައްވާފައިވެއެވެ.
