ޔޫއޭއީ އާއި ތައިލެންޑުން އާސަންދައިގެ ދަށުން ބަލި މީހުން ފޮނުވަން ސަރުކާރުން ނިންމިޔަސް، ގަވާއިދު ހަދާފައި އޮތީ ބަލި މީހުންނަށް ދެވޭނެ ފަދަ ގޮތަކަށް ނޫން ކަމަށް އެމްޑީޕީގެ ރައީސް އަބްދުﷲ ޝާހިދު ރޭ ވިދާޅުވެއްޖެ އެވެ.
މިދިޔަ ބުދަދުވަހު ޔޫއޭއީ އާއި ތައިލެންޑުގެ ހޮސްޕިޓަލުތަކަށް އާސަންދަ ފުޅާކޮށް، އެ ގައުމުތަކުން ވެސް އާސަންދައިގެ ދަށުން ދިވެހިންނަށް ބޭސްފަރުވާ ކުރެވޭނެ އިންތިޒާމު ހަމަޖައްސައި ހިދުމަތް ފަށާފައިވެ އެވެ. އާސަންދައިން ނެރުނު ބަޔާނެއްގައި ބުނެފައިވަނީ، އާސަންދަ ހިދުމަތް ދިނުމަށް ޔޫއޭއީގެ އެއް ހޮސްޕިޓަލާއި ބެންކޮކްގެ ދެ ހޮސްޕިޓަލާ އެކު އެއްބަސްވެފައިވާ ކަމަށެވެ. އަދި ފުރަތަމަ އިސްކަންދޭނީ ކިޑްނީ ޓްރާންސްޕްލާންޓް ހަދަން ބޭނުންވާ ފަރާތްތަކުގެ ތެރެއިން 'ފަސްޓް ޑިގްރީ ޑޯނާ’އެއް ނުލިބޭ ފަރާތްތަކަށް ކަމަށާއި، އާސަންދައިގެ ދަށުން އެ މީހުންނަށް ކިޑްނީ ޓްރާންސްޕްލާންޓް ކުރެވޭނެ ކަމަށެވެ. ދެވަނައަށް އިސްކަންދޭނީ ރާއްޖެ، އިންޑިއާ ނުވަތަ ލަންކާގެ ހޮސްޕިޓަލަކުން ތަކުރާރުކޮށް ފަރުވާ ހޯދިޔަސް އެކަށީގެންވާ ކުރިއެރުމެއް ނުލިބޭ ފަރާތްތަކަށެވެ. އަދި ކުރިއަށް އޮތް ތަނުގައި އިތުރު ބައިތަކަށް ހިދުމަތް ފުޅާކުރަން ވަނީ ނިންމާފައެވެ.
އެމްޑީޕީން ރޭ ޕީޓްރަލް ޕާކުގައި ބޭއްވި ކަންމަތީ ޖަލްސާގައި ވާހަކަ ދައްކަވަމުން ޝާހިދު ވިދާޅުވީ ރައީސް މުހައްމަދު މުއިއްޒު ވައުދުވެވަޑައިގެންނެވި ގޮތަށް ޔޫއޭއީ އާއި ތައިލެންޑަށް ބަލިމީހުން ފޮނުވަން ނިންމާ ގަވާއިދުތައް ހަދާފައިވާ ކަމަށެވެ. ނަމަވެސް ގަވާއިދު އޮތީ ބަލި މީހުންނަށް އެ ދެ ގައުމަށް ދެވޭނެ ގޮތަކަށް ނޫން ކަމަށް ވިދާޅުވި އެވެ.
ޝާހިދު ވިދާޅުވި ގޮތުގައި، އެދުވަހު އޭނާއާ ބައްދަލުވި ދޮށީ އުމުރުގެ ބޭފުޅަކު ވިދާޅުވެފައިވަނީ ބެންކޮކަށް ނުވަތަ ދުބާއީއަށް ދާންވެއްޖެއްޔާ ކަޅުހިލަ ގަހެއްގެ މަދާއި، ނުފޯދޭ ރުކެއްގެ އެތަކާއި ނުވިހާ ކުއްޖެއްގެ ފޫޅަކާ ގެންދާންޖެހޭ ކަމަށެވެ. އޭރުން އެ އޮތީ ބެންކޮކަށް ނުވަތަ ދުބާއީއަށް ދެވިފައި ކަމަށެވެ. އަދި އެ ބޭފުޅާއަކީ ކިޑްނީއަށާއި ހިތަށް ފަރުވާކުރަމުން އައި ބޭފުޅެއް ކަމަށާއި، އެހެން ނަމަވެސް އެ ބޭފުޅާއަށް ބޭނުންވާ އެއްވެސް ބޭހެއް އާސަންދައިގެ ތެރެއިން ނުލިބޭ ކަމަށް ވިދާޅުވިއެވެ.
ޝާހިދު އިތުރަށް ވިދާޅުވީ އަވަށްޓެރި ގައުމުތަކުން ފަސޭހަކަމާ އެކު ލިބެމުން ދިޔަ އާސަންދަ ހިދުމަތް މި ސަރުކާރުން ހުއްޓާލާފައި މިހާރު އާންމު ރައްޔިތުން ބޭސްފަރުވާއަށް ސަލާންޖަހަން މަޖުބޫރުވެފައިވާ ކަމަށެވެ.
އާސަންދަ ތެރެއިން ވަރަށް ބޮޑު އިސްރާފެއް ކުރަމުން ދާތީ އެކަންކަން އިސްލާހުކުރަމުން އަންނަ ކަމަށް ސަރުކާރުން ބުނެ އެވެ. އެގޮތުން ބައެއް ބޭސްތައް މާ އަގުބޮޑުވުމާ އެކު އާސަންދައިން އެކުލަވާލި އާ އޮނިގަނޑާ އެކު ބައެއް ބޭސްތަކަށް އަމިއްލައަށް އަގު ދައްކަން ޖެހުމުގެ ޝަކުވާ އާންމުން ކުރެ އެވެ.
