ރައީސް ޑރ. މުހައްމަދު މުއިއްޒު އެސްޓޯނިއާއަށް ކުރެއްވި ދަތުރުފުޅަކީ ވަރަށް ކާމިޔާބު ދަތުރުފުޅެއް ކަމުގައި ހޯމްލޭންޑް ސެކިއުރިޓީ އަދި ޓެކްނޮލަޖީ މިނިސްޓްރީގެ ސްޓޭޓް މިނިސްޓަރު ޑރ. މުހައްމަދު ކިނާނަތު ވިދާޅުވެއްޖެއެވެ. މި ދަތުރުފުޅުގައި ދެ ގައުމުގެ ދެމެދުގައި ތިން އެއްބަސްވުމެއްގައި ސޮއިކުރެވުނު ކަމަށާއި، އޭގެ ތެރެއިން އެއް އެއްބަސްވުމަކީ ޓެކްނޮލަޖީއާ ގުޅުންހުރި އެއްބަސްވުމެއް ކަމަށް ކިނާނަތު ފާހަގަކުރެއްވިއެވެ.
ޓެކްނޮލަޖީގެ އެއްބަސްވުމުގައި އީ-ގަވަނަންސް، ސައިބަރ ސެކިއުރިޓީ އަދި ނޮލެޖް ޝެއަރިންގފަދަ ރާއްޖެއަށް މުހިންމު ބައިތައް ހިމެނޭކަމަށް ވިދާޅުވެ، މި އެއްބަސްވުމުގެ ސަބަބުން ރާއްޖޭގެ ޓެކްނޮލަޖީގެ ދާއިރާއަށް އިތުރު ކުރިއެރުންތަކެއް ލިބިގެންދާނެކަމުގެ އުންމީދު ފާޅުކުރެއްވިއެވެ.
ރައީސް ޑރ. އަލާރް ކާރިސްގެ ދަޢުވަތަކަށް ކުރެއްވި މި ތާރީޚީ ދަތުރުފުޅުގެ މައިގަނޑު މަޤްޞަދަކީ ދެ ގައުމުގެ ދެމެދުގައި އޮތް ގުޅުން ބަދަހިކުރުމާއި، ޑިޖިޓަލް، ސައިބަރ އަދި އީ-ގަވަރނަންސްގެ ދާއިރާއިންނާއި މޫސުމާއި ތިމާވެށްޓާ ގުޅުންހުރި މައްސަލަތަކާ ބެހޭގޮތުން މަޝްވަރާކުރުމެވެ. މި ދަތުރުފުޅުގައި އުފެއްދުންތެރި ބައްދަލުވުންތަކެއް ބޭއްވި، ޑިޖިޓަލައިޒޭޝަން، ތިމާވެށި އަދި ސިޔާސީ މަޝްވަރާތަކާ ގުޅޭ އެއްބަސްވުންތަކުގައި ސޮއިކުރެވުނެވެ.
ޑިޖިޓަލް ރޭންކިންގއަށް ބަލާއިރު އެސްޓޯނިއާއަކީ ބޮޑެތި ކުރިއެރުންތަކެއް ހޯދާފައިވާ، ޓެކްނޮލަޖީގެ ގޮތުން ޔޫރަޕްގައި އެންމެ ކުރިއަރާފައިވާ އެއް ގައުމެވެ. ރައީސް މުއިއްޒު މި ތާރީޚީ ދަތުރުފުޅު ނިންމަވައި ރޭ ވަނީ މާލެ ވަޑައިގެންފައެވެ.
