ސަރުކާރުން ފޯރުކޮށްދޭ އާންމު ޚިދުމަތްތައް ޑިޖިޓަލައިޒްކޮށް، އެންމެ ފުރަތަމަ ތަޢުލީމީ އަދި ޞިއްޙީ ދާއިރާއިން އެ މަސައްކަތް ފައްޓަވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ. އެސްޓޯނިއާއަށް ކުރެއްވި ރަސްމީ ދަތުރުފުޅު ނިންމަވާލެއްވުމުގެ ކުރިން ޕީއެސްއެމަށް ދެއްވި ޚާއްޞަ އިންޓަވިއުއެއްގައި ރައީސް މުއިއްޒު ވަނީ ޤައުމީ އުފެއްދުންތެރިކަމުގެ 15 އިންސައްތަ ޑިޖިޓަލް ދާއިރާއިން ޤާއިމްކުރުމަށް ސަރުކާރުން އަމާޒު ހިފާފައިވާ ކަމަށް ވިދާޅުވެފައެވެ.
ކުރިއަށް އޮތް ތިން ހަތަރު އަހަރުގެ ތެރޭގައި ސަރުކާރުގެ ހުރިހާ ޚިދުމަތްތަކަކާއި، ޕަބްލިކް ސަރވިސްގެ އެންމެހައި މަސައްކަތްތަކާއި، ތަޢުލީމީ އަދި ޞިއްޙީ ދާއިރާ ޑިޖިޓަލައިޒް ކުރުމަށް ވަނީ ރޭވިފައެވެ. ރާއްޖެ ޑިޖިޓަލައިޒް ކުރުމަށް ސަރުކާރުން ގެންގުޅޭ ތަޞައްވުރު ހާސިލުކުރުމަށް އެސްޓޯނިއާއަށް ކުރެއްވި ދަތުރުފުޅު ވަނީ ވަރަށް ކާމިޔާބުވެފައިކަން ރައީސް ފާހަގަކުރައްވައިފިއެވެ.
ޑިޖިޓަލް އިޤްތިޞާދެއް ބިނާކުރުމުގައި މުޅި ދުނިޔެއަށް ނަމޫނާއަކަށްވެފައިވާ އެސްޓޯނިއާގެ އެހީތެރިކަމާއި އެއްބާރުލުން ދިވެހިރާއްޖެއަށް ލިބޭނެކަމުގެ ޔަޤީންކަން މި ދަތުރުފުޅުން ލިބިވަޑައިގެންފައިވާ ކަމަށް ރައީސް މުއިއްޒު ވިދާޅުވެފައިވެއެވެ. އަދި 2040 ވަނަ އަހަރާ ހަމައަށް ދިވެހިރާއްޖެ ތަރައްޤީވެފައިވާ ޤައުމަކަށް ހެދުމުގެ ތަޞައްވުރު ހާސިލުކުރުމަށް އާޓިފިޝަލް އިންޓެލިޖެންސް ފަދަ ޒަމާނީ ޓެކްނޮލޮޖީގެ މުހިންމުކަން ފާހަގަކުރައްވައި، ރާއްޖޭގައި އޭއައި މާސްޓަރ ޕްލޭނެއް އެކުލަވާލައި، ޤައުމު ތަރައްޤީކުރުމުގައި އޭއައި މުހިންމު ދައުރެއް އަދާކުރާނެ ކަމަށް ވިދާޅުވެފައިވެއެވެ.
މި އަމާޒުތައް ހާސިލުކުރުމުގައި މިހާރުވެސް ކާމިޔާބުކަމާއެކު ކުރިއަށްދާ އެސްޓޯނިއާފަދަ ޤައުމެއްގެ އެހީތެރިކަން ލިބުމަކީ ވަރަށް ބޮޑު ކުރިއެރުމެއްގެ ގޮތުގައި ރައީސް މުއިއްޒު ފާހަގަކުރައްވާފައިވެއެވެ.
