ކުރިއަށް އޮތް 24 ގަޑިއިރުގެ ތެރޭގައި އުތުރާއި މެދުރާއްޖެތެރޭގެ ސަރަހައްދުތަކުގައި މޫސުން ގޯސްވާނެކަމަށް ލަފާކުރެވޭކަމަށް މޫސުމާބެހޭ ޤައުމީ އިދާރާއިން ބުނެފިއެވެ. މި ގޮތުން މި ސަރަހައްދުތަކަށް ގުގުރުމާއެކު ވިއްސާރަވެހި، ބައެއް ރަށްތަކަށް ބޯކޮށް ވާރޭވެހުމަކީ އެކަށީގެންވާ ކަމެކެވެ.
އިތުރު ތަފްސީލުތަކުގެ ތެރޭގައި އުތުރާއި މެދުރާއްޖެތެރޭގެ އަތޮޅުތަކަށް އިރުއުތުރާއި އިރުދެކުނުން ގަޑިއަކު 13 މޭލާއި 23 މޭލާ ދެމެދުގެ ބާރުމިނުގައި ވައިޖެހޭނެ ކަމަށް ލަފާކުރެވެއެވެ. އަދި ވިލާގަނޑުގައި ވައިގެ ބާރުމިން ގަޑިއަކު 40 މޭލަށް އަރާފާނެކަމަށްވެސް ބެލެވެއެވެ. މީގެ އިތުރުން ދެކުނުގެ އަތޮޅުތަކަށްވެސް ކެރީގެ އަސަރު ކުރާނެކަމަށް އިދާރާއިން ފާހަގަކުރައްވައެވެ.
މި މޫސުމުގެ ނުތަނަވަސްކަން ކުރިމަތިވަނީ ބޭ އޮފް ބެންގާލްގެ ހުޅަނގުގައި އުފެދިފައިވާ ކޮޅިގަނޑެއް ރާއްޖެއާ ކައިރިވަމުން އަންނާތީއެވެ. މިކަމުގެ ސަބަބުން ރާއްޖޭގެ ސަރަހައްދުގައި ގިނަ އަދަދެއްގެ ވިއްސާރަ ވިލާ އުފެދެމުންދާކަމަށް އިދާރާއިން ފާހަގަކުރައްވައެވެ. އެންމެ ފަހުގެ މައުލޫމާތުތަކަށް ބަލާއިރު، މޫސުން އެންމެ ގޯސްވާނެ ކަމަށް ލަފާކުރެވެނީ ކުރިއަށް އޮތް ހުކުރު ދުވަހުއެވެ.
