ފުލުހުން މިއަދު ފަށާފައިވާ އޮޕަރޭޝަނެއްގައި ރ. އަލިފުށްޓާއި އެ އަތޮޅު މީދޫގައި ސިހުރު ހަދާކަމަށް ތުހުމަތުކުރެވޭ ގެތަކެއް ބަލައި ފާސްކޮށްފިއެވެ. މި އޮޕަރޭޝަނަކީ އެ ދެ ރަށުގައި ސިހުރު ހެދުމާ ގުޅޭގޮތުން ފުލުހުންނަށް ލިބިފައިވާ މަޢުލޫމާތަކާ ގުޅިގެން ހިންގާ އޮޕަރޭޝަނެއް ކަމަށް ބުނެފައިވީ ނަމަވެސް، އިތުރު އެއްވެސް ތަފްސީލެއް ހާމަކޮށްފައެއް ނުވެއެވެ.
މި މައްސަލައާ ގުޅިގެން އެ ދެ ރަށުގެ ރައްޔިތުން ވަނީ ސޯޝަލް މީޑިއާގައި ސިހުރު ހެދުމާ ގުޅޭގޮތުން ކަންބޮޑުވުން ފާޅުކޮށްފައެވެ. މިއީ ސިހުރު ހެދުމާ ގުޅިގެން ފުލުހުން ހިންގި ފުރަތަމަ އޮޕަރޭޝަން ނޫނެވެ. މީގެ ކުރިން ވެސް މިފަދަ މައްސަލަތަކުގައި މީހުން ހައްޔަރުކޮށްފައިވާއިރު، ވޭތުވެދިޔަ އަހަރު ށ. ކަނޑިތީމުގައި ހިންގި އޮޕަރޭޝަނެއްގައި ސިހުރު ހެދުމަށް ބޭނުންކުރާ އެކި ބާވަތުގެ ސާމާނު ފުލުހުންނަށް ހޯދާފައިވެއެވެ.
