އެމްޑީޕީއާއި އަލުން ގުޅިވަޑައިގެންނެވި މެންބަރުންނަށް އެޕާޓީގެ ރައީސް އަބްދުﷲ ޝާހިދު މަރުޙަބާ ވިދާޅުވެއްޖެއެވެ. އަލުން ގުޅިވަޑައިގަތް ފަރާތްތަކުގެ ތެރޭގައި ޑިމޮކްރެޓްސްގެ ކުރީގެ ރައީސް ހަސަން ލަތީފާއި، ނައިބު ރައީސް މުހައްމަދު ޝިފާޒުގެ އިތުރުން، އެމްޑީޕީގެ ކުރީގެ ޕީޖީ ލީޑަރު ޢަލީ އާޒިމާއި ރިޔާސީ އިންތިޚާބުގައި ޑިމޮކްރެޓްސްގެ ކެންޑިޑޭޓުގެ ރަނިންމޭޓެއްގެ ގޮތުގައި ވާދަކުރެއްވި ޙުސެއިން ޢަމްރު ހިމެނިވަޑައިގަނެއެވެ.
ޝާހިދު ވިދާޅުވެފައިވަނީ އެމްޑީޕީއަކީ ދިވެހިރާއްޖެއަށް އުއްމީދާއި ހެޔޮ ބަދަލު ގެނެސްދޭ ފަޚުރުވެރި ޕާޓީއެއް ކަމަށެވެ. އަދި އެ ޕާޓީން އަބަދުވެސް ރައްޔިތުން ބާރުވެރިކުރުމަށް މަސައްކަތްކުރަމުންދާ ކަމަށް ފާހަގަކުރައްވައި، ޑިމޮކްރަސީ ހަރުދަނާކޮށް، ރައްޔިތުންގެ ބާރުވެރިކަން އިތުރުކުރުމަށް އެމްޑީޕީން ކުރަމުންގެންދާ މަސައްކަތްތަކުގައި ވީހާވެސް ގިނަ ބޭފުޅުން ބައިވެރިވެވަޑައިގަތުމަށް އެދިވަޑައިގެންފައިވެއެވެ.
އެމްޑީޕީގެ ލީޑަރޝިޕުން މި މެންބަރުންނަށް މަރުހަބާ ދަންނަވާފައިވާއިރު، ޑިމޮކްރެޓްސްއިން ބުނެފައިވަނީ އެ ޕާޓީގެ ކުރިއެރުން އަދި ކުރިއަށް އޮތް ކަމަށެވެ. އަދި ކުރިއަށް އޮތް ތަނުގައި ޕާޓީގެ މަސައްކަތްތައް ބާރު ސްޕީޑެއްގައި ކުރިއަށް ގެންދާނެ ކަމަށް އެ ޕާޓީން މިއަދު ހާމަކޮށްފައިވެއެވެ. ޑިމޮކްރެޓްސްއިން އިތުރަށް ފާހަގަކޮށްފައިވަނީ ޕާޓީ ދޫކޮށްދިޔަ ބޭފުޅުންނާ އެއްވެސް މައްސަލައެއް ނެތް ކަމަށާއި، ޕާޓީ ބަދަލުކުރެއްވުމަކީ އެ ބޭފުޅުންގެ އަމިއްލަ ސިޔާސީ ނިންމެވުމެއް ކަމުގައެވެ.
