އެންމެ މަތިވެރި ސުލޫކުން އެންމެ ފުރަތަމަ ޒީނަތްތެރިވާނެ ޖެހޭނީ ބަޔަކީ މުވައްޒަފުން ކަމުގައި މިއަދުގެ ހުކުރު ޚުޠުބާގައި ވިދާޅުވެއްޖެއެވެ.
"މަސައްކަތުގެ އަޚުލާގު" މިމައުޟޫއަށް ޚާއްސަ ކުރެވިގެންދިޔަ މިއަދުގެ ހުކުރު ޚުޠުބާގައި ވިދާޅުވީ ވަޒީފާގެ މައިދާނުން ރިވެތި މާތް އަޚުލާގީ ސިފަތައް ފެންނާން ޖެހޭ ކަމަށާއި، ކޮންމެ މުވައްޒަފަކީވެސް އޭނާ ވާ ކޮންމެ ތަނެއްގައި އޭނާ ހެއްދެވި މަގުސަދުގެ މަތިން ހަނދާންކޮށް އެމަގުސަދު ހާސިލް ކުރުމަށް މަސައްކަތްކުރަންޖެހޭ މީހެއް ކަމުގައެވެ.
މާތް ﷲ ވަހީ ކުރައްވާފައިވާ ބަސްފުޅެއްގެ މާނާގައި ވެއެވެ. "ތިމަން ރަސްކަލާނގެއަށް އަޅުކަން ކުރުމަށް މެނުވީ، ތިމަން ރަސްކަލާނގެ ޖިންނީންނާއި އިންސީން ނުހައްދަވަމެވެ." މިމަގުސަދު ހާސިލް ކުރެވޭނީ މާތް ﷲއާއި އެކަލާނގެ އަޅާއާ ދެމެދު އޮންނަ ގުޅުން ރަގަޅު ކުރެވިގެންނެވެ. އަދި ދޭދޭ ފަރުދުންގެ މެދުގައި ކުރެވޭ މުއާމަލާތްތަކަކީ އަޚްލާގީ އިމުގެ ތެރެއިން ކުރެވޭ ހެޔޮ މުއާމަލާތްތަކަކަށް ވެގެންނެވެ.
މިއަދުގެ ޚުޠުބާގައި ވިދާޅުވެފައި ވެއެވެ.
ޚުޠުބާގައި އިތުރަށް ވިދާޅުވި ގޮތުގައި އިސްލާމީ ޝަރީއަތާއި އަދި ވަޟުޢީ ގާނޫނު ބުނެދޭ މަތިވެރި އަޚްލާގުގެ އެންމެ ކުރީގައިވަނީ އަހުދަށް ރައްކާތެރި ވުމެވެ، ޙަވާލުކުރެވޭ ޒިންމާ ފުރިހަމަޔަށް އަދާކުރުމެވެ.
މުވައްޒަފެއްގެ ހައިސިއްޔަތުން ތިބާ އެއްބަސްވެ، ސޮއިކުރި ވަޒީފާ ބަޔާނާ އެއްގޮތަށް އަމަލުކުރުމެވެ. ވަޒީފާގެ މަސްއޫލިއްޔަތަކީ މުވައްޒަފުން ރައްކާތެރިވާންޖެހޭ ބޮޑު އާމާތެކެވެ. ވެވޭ އަހުދަކާއި އަގުދެކެވެ.
ޚުޠުބާގައި އިތުރަށް ވިދާޅުވެފައި ވެއެވެ.
