އެމްޑަބްލިއުއެސްސީގެ ހިދުމަތްތައް އޮންލައިންކޮށް ދޭނެ ޕޯޓަލްއެއް ލޯންޗުކޮށްފިއެވެ.
މި ޕޯޓަލް މެދުވެރިކޮށް ފެން ކުންފުނީގެ އެކި ހިދުމަތަށް އެދި ހުށައެޅުމާއި އެޕްލިކޭޝަންތައް ކުރިޔަށްދާ މަރުހަލާތައް ބަލާލުން ފަދަ "އެމްޑަބްލިއުއެސްސީ އީ-ޕޯޓަލް" އިން ލިބޭނެއެވެ.
އެ ޕޯޓަލް އިފުތިތާހުކޮށް ދެއްވީ އެކަމަށްޓަކައި މިއަދު ބޭއްވި ރަސްމިއްޔާތުގައި އެމްޑަބްލިޔުއެސްސީގެ މެނޭޖިން ޑިރެކްޓަރު ޢަބްދުލް މަތީން މުޙައްމަދާއި ޗެއާޕާސަން ޝަމްހޫޒާ އަހުމަދެވެ.
އެމްޑަބްލިޔުއެސްސީގެ ޕޯޓަލްގެ ޚިދުމަތް ލިބޭނީ އީ-ފާސް ނިޒާމު މެދުވެރިކޮށެވެ. އޮންލައިން ޕޯޓަލް މެދުވެރިކޮށް، ކަސްޓަމަރުން ހުޅުވާފައިވާ ހުރިހާ އެކައުންޓެއްގެ މަޢުލޫމާތު ބެލޭނެއިރު، އެއް އެކައުންޓެއް މެދުވެރިކޮށް އެއް ބިލަށްވުރެ ގިނަ ބިލުތަކަށް އެއްފަހަރާ ފައިސާ ދެއްކުމުގެ މަގުފަހިވާނެއެވެ.
މީގެ އިތުރުން ސްމާޓް މީޓަރު ހަރުކޮށްފައިވާ ގޭބިސީތަކުގެ ކަސްޓަމަރުންނަށް ވަކިވަކި މީޓަރުތަކުން ފެން ބޭނުން ކުރެވިފައިވާ މިންވަރުގެ ތަފުސީލާއި، ފެން މީޓަރުގެ ރީޑިންގެ އިތުރުން ފެން ބިލުތަކުގެ ތަފުސީލުތައް ވެސް ބެލޭނެއެވެ.
