އިންސާނާގެ ހަޔާތުގެ ފިޠުރަތަކީ ދަތި އުނދަގުލަށްފަހު ފަސޭހަކަން އައުން، ހިތާމައަކަށްފަހު އުފާވެރިކަން އައުން ކަމުގައި މިއަދުގެ ހުކުރު ޚުޠުބާގައި ވިދާޅުވެއްޖެއެވެ.
"ދިރިއުޅުމުގައި ދިމާވާ ދަތިތަކާމެދު މާޔޫސް ނުވުން" މި މައުޟޫއަށް ޚާއްސަކުރެވުނު މިއަދުގެ ޚުޠުބާގައި ވިދާޅުވީ ދިރިއުޅުމުގެ ހަޔާތަކީ ހިތްދަތި ކަންކަމާއި ހިތާމަތަކާއި ދަތި އުނދަގޫ ކަންކަން ހިމެނިގެންވާ ޙަޔާތެއް ކަމުގައެވެ.
ދަތި އުނދަގުލަކަށްފަހު ފަސޭހަކަން އަންނާނެކަން ކަށަވަރެވެ. ހިތާމައަކަށްފަހު އުފާވެރިކަން އަންނާނެކަން ޔަގީނެވެ. މިއީ ހަޔާތުގެ ފިޠުރަތެވެ. މުއުމިން އިންސާނާއަށް ހުރިހައި ކަމެއްގައިވެސް ވަނީ ހެޔޮކަމެވެ. އުފާވެރިކަމެއް މެދުވެރި ވެއްޖެނަމަ ޝުކުރުވެރި ވެއެވެ. ހިތްދަތިކަމެއް މެދުވެރި ވެއްޖެނަމަ ކެތްތެރި ވެއެވެ.
މިއަދުގެ ޚުޠުބާގައި ވިދާޅުވީ ހިތްދަތިކަމުން އަރައިގަތުމަށް މަސައްކަތް ކުރާންވާނީ އަޒުމާއި ހިތްވަރާ އެކުގައި ކަމުގައެވެ. އަދި ކިތައްމެ އަގީދާ ވަރުގަދަ މީހަކުނަމަވެސް މާޔޫސްވުމުގެ ތެރެއަށް ވެއްޓިދާނެ ހާލަތެއް އަތުވެދާނެކަން ބަޔާން ކުރަމުން ޚުޠުބާގައި ވިދާޅުވެފައިވަނީ އެއީ އިންސާނާގެ ބަލިކަށިކަން ކަމުގައެވެ.
އަދި އިންސާނާގެ އަގީދާ ނަފްސު މާޔޫސްކަމުން ސަލާމަތް ވުމަށްޓަކާ އަގީދާގައި ސާބިތު ވުމަކީ މުހިންމުކަމެއް ކަމުގައިވެސް ޚުޠުބާގައި ވިދާޅުވެފައި ވެއެވެ. އެގޮތުން ވަސްވާސްތަކުގެ ޝިކާރައަކަށް ނުވެ، ވަރުގަދަ އަޒުމަކާއެކު ސަލާމަތުގެ އައްސޭރިއަށް ވާސިލް ވެވިދާނެކަމަށް ޚުޠުބާގައި ވިދާޅުވެފައި ވެއެވެ.
މުސްލިމް އަޚުންނޭވެ! ދިރިއުޅުމުގައި ދިމާވާ ދަތިކަމަކަށްފަހު ލުޔެއް ލިބޭނެކަމުގެ އުއްމީދު ބައެއް މީހުން ކަނޑާލައެވެ. ނަމަވެސް އިންސާނާއާ އެކި ގޮތްގޮތުން ދިމާވާ މުސީބާތްތަކާއި ދަތިކަން ފިލައިދުން ﷲގެ އިރާދަފުޅުގައި ކަނޑައަޅުއްވާފައި ވެއެވެ. އެހެންނަމަވެސް ބައެއް މީހުންގެ މަސައްކަތަކަށް ވެފައި އޮންނަނީ، އެފަދަ ކަންކަމުން ސަލާމަތްވުމަށް މަސައްކަތް ކުރުމުގެ ބަދަލުގައި ނާއުންމީދުގެ ބަސްތައް ތަކުރާރު ކުރުމުވެ. މިފަދަ ޝުއޫރުތަކާއި ވާހަކަތައް ދެކެވެނީ އުއްމީދު ކެނޑި ދުނިޔެވީ ހަޔާތުން މާޔޫސްވެފައި ވާތީއެވެ.
މިއަދުގެ ޚުޡުބާގައި ވިދާޅުވެފައި ވެއެވެ.
