އޭސީސީން މިއަދު ހާމަކުރި ގޮތުގައި، ފެނަކަ ކޯޕަރޭޝަންގެ ކުރީގެ ވެރިން ހިމެނޭ ގިނަ ސީރިއަސް މައްސަލަތަކާ ގުޅިގެން ދަޢުވާ ކުރުމާ މެދު ގޮތެއް ނިންމުމަށް ޕްރޮސެކިއުޓަރ ޖެނެރަލްގެ އޮފީހާ އެކު މަޝްވަރާތައް ކުރިއަށްދާ ކަމަށް ބުނެފައިވެއެވެ.
މި މަޝްވަރާތަކުގެ ތެރެއިން، ޕްރޮސެކިއުޓަރ ޖެނެރަލްގެ އޮފީހުން މިއަދު ވަނީ ފެނަކައިގެ ކުރީގެ މެނޭޖިން ޑިރެކްޓަރު އަޙްމަދު ސަޢީދު މުޙައްމަދު އަދި ކުންފުނީގެ ކުރީގެ ޕްރޮކިއުމަންޓް ހެޑް މަރިޔަމް ދީނާ ޞާލިޙްގެ މައްޗަށް ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ދަޢުވާ ކްރިމިނަލް ކޯޓަށް ހުށަހަޅާފައެވެ. މި ދަޢުވާ ސާބިތުވެއްޖެނަމަ، ދެ ފަރާތަށްވެސް 1 އަހަރާއި 7 މަހާއި 6 ދުވަހުގެ އަސާސީ ޖަލު ޙުކުމެއް ކަނޑައެޅިގެންދާނެއެވެ.
މި ދަޢުވާ އަމާޒުވެފައިވަނީ 2018 ވަނަ އަހަރު ފެނަކައާއި ބްލޭޒަން އިންކް ޕްރައިވެޓް ލިމިޓެޑާ ދެމެދު ވެވުނު އެއްބަސްވުމަކާ ގުޅިގެން، ބްލޭޒަން އިންކުން މަސައްކަތް ފުރިހަމަ ނުކޮށް އަދި މަސައްކަތް ނިމުނުކަން ކަށަވަރު ނުކުރެވި ވަނިކޮށް، އެ ކުންފުންޏަށް ފައިސާ ދޫކޮށް، ނާޖާއިޒު މަންފާއެއް ހޯދައިދިން މައްސަލައަށެވެ. މި އަމަލުގެ ސަބަބުން ފެނަކައަށް 848،000 ރުފިޔާގެ ގެއްލުމެއް ވެފައިވާކަން ޕީޖީ އޮފީހުން ފާހަގަކޮށްފައިވެއެވެ.
އޭސީސީން އިތުރަށް ބުނެފައިވަނީ މި މައްސަލައިގައި ކޮރަޕްޝަންގެ ސަބަބުން ފެނަކައަށް ގެއްލުނު ފައިސާ އަނބުރާ ހޯދުމަށް އެންގުމަށް ނިންމާފައިވާ ކަމަށެވެ. މީގެ އިތުރުންވެސް، ފެނަކައިގެ ކުރީގެ ވެރިންނާ ގުޅުންހުރި އެހެން ސީރިއަސް މައްސަލަތަކެއްގައި ދަޢުވާކުރުމާމެދު ގޮތެއް ނިންމުމަށް ޕީޖީ އޮފީހާއެކު މަޝްވަރާތައް ކުރިއަށްދާކަން އޭސީސީން ހާމަކޮށްފައިވެއެވެ.
