އެމްޑީޕީ ސަރުކާރުން ކުރިއަށް ގެންދިޔަ 4،000 ފްލެޓް ދޫކުރުމުގެ މައްސަލައިގައި ދަޢުވާ އުފުލުމަށް ޕްރޮސެކިއުޓަރ ޖެނެރަލްގެ އޮފީހުގައި އެދުމުގެ މަސައްކަތް ފަށާފައިވާކަމަށް އޭސީސީން މިރޭ ހާމަކޮށްފިއެވެ.
މި މައްސަލައަކީ އާންމު މަސްލަހަތު ބޮޑު މައްސަލައެއްކަމަށް ބުނެ، ދަޢުވާކުރެވޭނެ ފަރާތްތައް ކަނޑައެޅުމަށް ޕީޖީ އޮފީހާއެކު ޑިއުޓީ ޕްރޮސެކިއުޝަން މަރުހަލާ ފަށާފައިވާ ކަމަށް އޭސީސީން ބުނެފައިވެއެވެ.
އެމްޑީޕީގެ ސަރުކާރުން ހުޅުމާލޭގައި 4،000 ފްލެޓް އެޅުމުގެ މަޝްރޫޢު ފެށި ނަމަވެސް، އެ ސަރުކާރުގެ ދައުރު ނިމުނުއިރު އެއްވެސް ފްލެޓެއްގެ މަސައްކަތް ފުރިހަމައަށް ނިމިފައެއް ނުވެއެވެ. އެހެންނަމަވެސް ރައީސް އިބްރާހީމް މުހައްމަދު ސޯލިހްގެ ސަރުކާރުގެ ދައުރު ނިމުމާ ކައިރިވެފައިވަނިކޮށް ފްލެޓް ލިބޭ ފަރާތްތަކުގެ ފައިނަލް ލިސްޓް އާންމުކުރިއެވެ.
އެ ލިސްޓާ ގުޅިގެން އޭސީސީއަށް ހުށަހެޅުނު ގިނަ ޝަކުވާތަކެއް ތަހުގީގުކުރުމަށްފަހު، 4،000 ފްލެޓް ލިބޭ މީހުންގެ ތެރެއިން އެންމެ 20 ޕަސެންޓް މީހުން އެކަނި ޝަރުތު ހަމަވާކަމަށް އޭސީސީގެ ރިޕޯޓުގައި ފާހަގަކޮށްފައިވެއެވެ. މިކަމާ ގުޅިގެން އެމްޑީޕީ ސަރުކާރުގެ އިސްވެރިން އޭސީސީގެ ތުހުމަތުތަކަށް އިންކާރުކުރަމުން ގެންދެއެވެ.
މި މައްސަލައާ ގުޅިގެން، ރައީސް ޑރ. މުހައްމަދު މުއިއްޒު ވެރިކަމާ ހަވާލުވުމަށްފަހު ފްލެޓް ލިސްޓް އަލުން މުރާޖައާކުރުމުގެ މަސައްކަތް ފަށާފައިވީ ނަމަވެސް، ވެރިކަމަށް އެއް އަހަރު ފުރުނުއިރުވެސް އެ މަސައްކަތް ނިމިފައިނުވާތީ، ގިނަ އަދަދެއްގެ ރައްޔިތުން މިހާރު ދަނީ ރައީސް މުއިއްޒުގެ ސަރުކާރަށްވެސް ފާޑުކިޔަމުންނެވެ.
