ރާއްޖެއިން ބޭރަށް ގެންދަން އުޅުނު 582 ކިލޯގެ މިޔަރުމަހާއި މަޑިމަސް އަތުލައިގަނެ ނައްތާލާފައިވާކަމަށް މޯލްޑިވްސް ކަސްޓަމްސް ސާވިސްއިން ހާމަކޮށްފިއެވެ.
މި މަހުގެ 22 ވަނަ ދުވަހު ނައްތާލި މި ތަކެތި ރާއްޖެއިން ބޭރަށް ގެންދަން އުޅެފައިވަނީ ލޮނުއަޅައި ހިއްކާފައިވާ ހާލުގައެވެ.
ރާއްޖޭގެ މަސްވެރިކަމުގެ އާންމު ގަވާއިދުގެ ދަށުން މިޔަރާއި މަޑި ހިފުމާއި މެރުން ވަނީ މަނާކޮށްފައެވެ. މިއީ ދުނިޔެއިން ނެތިދާނެ ކަމުގެ ބިރު ހީވާތީ ރައްކާތެރިކުރެވިފައިވާ ދިރުންތަކެކެވެ. އެހެންނަމަވެސް، މިޔަރުގެ އާބާދީ އިތުރުވެ، ފަރުމަހުގެ މަސްވެރިކަމަށް މިޔަރުގެ ސަބަބުން ލިބޭ ގެއްލުން ބޮޑުކަމަށް މަސްވެރިން ޝަކުވާކުރަމުން ދެއެވެ. މީގެ އިތުރުން، ކުރީގައި ހުއްދަ އޮތް ގޮތަށް މިޔަރު ހިފުން އަލުން ހުއްދަކުރުމަށް ބައެއް ފަރާތްތަކުން ގޮވާލަމުން އަންނަ ކަމަށްވެސް ފާހަގަކުރެވެއެވެ.
