އިއްޔެ އިސްލާމިކް މިނިސްޓްރީން ވަނީ ކްރިސްމަސް ދުވަހާ ދިމާކޮށް، ރާއްޖޭގައި އެހެން ދީންތަކުގެ ޝިއާރު ފާޅުކޮށް ހަރަކާތްތައް ހިންގުމަކީ މަނާކަމެއްކަން ހަނދާންކޮށްދީފިއެވެ.
އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ސޮއިކުރައްވައި ހުރިހާ ރަށެއްގެ ކައުންސިލްތަކަށް ފޮނުވި ސާކިއުލާގައި ވިދާޅުވެފައިވަނީ، އެކިއެކި ވަޒީފާތަކަށް ބިދޭސީންނާއި ޓޫރިސްޓުން ގެންނަ ފަރާތްތަކުން ރާއްޖޭގެ ގާނޫނުތަކާއި ގަވާއިދުތަކަށް ތަބާވުމަށް އެ މީހުންނަށް އިރުޝާދު ދޭންވާނެ ކަމަށެވެ.
ރާއްޖޭގެ ދީނީ އެއްބައިވަންތަކަން ހިމާޔަތްކުރުމުގެ ގަވާއިދުގެ ދަށުން، ރާއްޖޭގައި އުޅޭ އަދި ޒިޔާރަތްކުރާ ޣައިރު މުސްލިމުންނަށް ފާޅުކަން ބޮޑު ގޮތެއްގައި އެމީހުންގެ ދީނީ ޝިއާރުތައް ފާޅުކުރުމާއި، އާންމު ތަންތަނުގައި ޖަމާއަތްހަދައިގެން ދީނީ ހަރަކާތްތައް ހިންގުން މަނާކުރެއެވެ. އަދި މިފަދා ހަރަކާތްތަކުގައި ދިވެހިން ބައިވެރިކުރުންވެސް މަނާކުރެއެވެ. މިނިސްޓްރީން ވަނީ ރާއްޖޭގެ އެއްވެސް އާންމު ތަނެއްގައި އިސްލާމްދީން ފިޔަވައި އެހެން އެއްވެސް ދީނެއްގެ އަޅުކަމާ ގުޅޭ ކަމެއް ހިންގުމަކީ ކަނޑައެޅިގެން މަނާކަމެއްކަން އަންގާފައެވެ.
ގެސްޓް ހައުސް ހިންގާ ރަށްރަށުގައިވެސް ގަވާއިދާ އެއްގޮތަށް އުޅުމަށާއި، އާންމު އިޖުތިމާއީ މިންގަނޑަށް ފެތޭ ހެދުމެއްގައި އުޅުމަށް ޓޫރިސްޓުންނަށް އިރުޝާދު ދިނުމަށް މިނިސްޓްރީން ވަނީ އިލްތިމާސްކޮށްފައެވެ. މީގެއިތުރުން، ކައުންސިލްތަކަށް މި ކަންކަމަށް ހާއްސަ ސަމާލުކަމެއް ދިނުމަށާއި، މިފަދަ މައްސަލަތަކުގައި އަޅަންޖެހޭ ފިޔަވަޅުތައް އެޅުމަށްވެސް އަންގާފައިވެއެވެ. ފާހަގަކޮށްލެވޭ ކަމެއްގެ ގޮތުން، ކޮންމެ އަހަރެއްގެ ކްރިސްމަސް ދުވަހާ ދިމާކޮށް ބައެއް އާންމު ތަންތަނުގައި ކްރިސްމަސް ޑެކަރޭޝަންތައް ކުރާ މައްސަލަ ފެންމަތިވެ، ފުލުހުން އެފަދަ ކަންކަން ހުއްޓުވަމުންދެއެވެ.
