ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ގެއްލުނު ފަސް ލެޕްޓޮޕް މިހާރު ހޯދާފައިވާކަމަށް ފުލުހުން ހާމަކޮށްފިއެވެ. މި މައްސަލަ ހޯމަ ދުވަހު އެޗްޑީސީ އިން ފުލުހުންނަށް ރިޕޯޓުކުރުމާ ގުޅިގެން ފުލުހުން ވަނީ ތަހުގީގު ފަށާފައެވެ.
ފުލުހުންގެ ތަރުޖަމާނު އޭސީޕީ އަހްމަދު ޝިފާން ވިދާޅުވި ގޮތުގައި މި ފަސް ލެޕްޓޮޕަކީ ފަރުކޮޅުފުށީގައި ހުންނަ އެޗްޑީސީގެ ޕްރޮޖެކްޓް އޮފީހުގައި ހުރި ލެޕްޓޮޕްތަކެކެވެ. މި މައްސަލައިގައި ތުހުމަތުކުރެވޭ ފަރާތް މިވަގުތު ހުރީ މަސްތުވާތަކެތީގެ މައްސަލައެއްގައި ހައްޔަރުކުރެވިފައެވެ. އެ ފަރާތުން ފުލުހުންނަށް އެއްބާރުލުން ދިނުމާ ގުޅިގެން ގެއްލުނު ފަސް ލެޕްޓޮޕް މިހާރުވަނީ އަނބުރާ ހޯދިފައެވެ.
މި މައްސަލަ ހާމަވެގެން އައީ އެޗްޑީސީ އިން ހުޅުމާލެއިން ވަގަށް ގޯތިތަކެއް ދޫކުރި މައްސަލައެއް ބަލަމުންދަނިކޮށެވެ. އެ މައްސަލައިގައި ބިންވެރިޔާ ސްކީމްގެ ދަށުން ގޯތި ލިބުނު ކަމަށް ދައްކައި، ފޯޖުކޮށްފައިވާ ލިޔެކިޔުންތަކެއް ބޭނުންކޮށްގެން ވަގަށް ގޯތި ދޫކޮށްފައިވާކަން ވަނީ ހާމަވެފައެވެ. މި މައްސަލައިގައި އެޗްޑީސީގެ ކުރީގެ މެނޭޖިންގ ޑިރެކްޓަރު އިބްރާހީމް ފަޒުލް ރަޝީދުގެ ބޭބެ، މުހައްމަދު ފަޒީލް ރަޝީދުގެ ނަން ވަނީ ގުޅިފައެވެ. ބިންވެރިޔާ ސްކީމްގެ ދަށުން ގޯއްޗަށް ޝަރުތު ހަމަނުވާ ފަޒީލް ރަޝީދަށް ގޯއްޗެއް ހޯދައިދިނުމަށް މަސައްކަތްކޮށްފައިވާކަން ވަނީ ހާމަވެފައެވެ.
މީގެ އިތުރުން، މި ސަރުކާރުގެ ތެރޭގައި އެޗްޑީސީ އިން ކުރީގެ މިނިސްޓްރީ އޮފް ނޭޝަނަލް ޕްލޭނިންގ، ހައުސިން އެންޑް އިންފްރާސްޓްރަކްޗަރގެ ނަމުގައި "ބަންޑާރަ ގޯތީގެ ރަޖިސްޓަރީ" ގެ ވަގު ޑޮކިއުމެންޓް ތައްޔާރުކޮށްފައިވާކަންވެސް ވަނީ ކަށަވަރުވެފައެވެ. މިހާރު އެޗްޑީސީ ގެ ތެރެއިން ހިނގާފައިވާ އެކި ވައްކަމާއި، ޚިޔާނާތާއި މަކަރު ހީލަތުގެ ޢަމަލުތައް ދަނީ ހާމަވަމުންނެވެ.
