މާލެ ސަރަހައްދުގެ ގޭބިސީތަކުން ނެގޭ ކުނީގެ ފީ ކަރަންޓު ބިލުގައި ހިމެނުމަށް އެންވަޔަރަމެންޓު މިނިސްޓްރީން ނިންމައިފިއެވެ. މިކަން ހާމަކޮށްފައިވަނީ އެމިނިސްޓްރީން ކޮށްފައިވާ އިއުލާނެއްގައެވެ. މި ގޮތަށް ނިންމާފައިވަނީ ގޭބިސީތަކުން ކުނި އުކުމުގެ ފީ ގަވައިދުން ނުދައްކާތީ ކަމަށް އެ މިނިސްޓްރީން ނެރުނު ބަޔާނުގައި ފާހަގަކޮށްފައިވެއެވެ.
މާލެ ސަރަހައްދުގައި 53،000 އަށް ވުރެ ގިނަ ގޭބިސީއަށް ކުނި ނެގުމުގެ ޚިދުމަތް ފޯރުކޮށްދޭއިރު، ވެމްކޯއަށް ގަވައިދުން ފީ ދައްކަނީ އެންމެ 20،000 ގޭބިސީން ކަމަށް އެ ބަޔާނުގައި ބުނެފައިވެއެވެ. އެ ސަބަބަށްޓަކައި ވެމްކޯއަށް ބޭނުންވާ ސާމާނު ނުހޯދިފައިވާ ކަމަށާއި އަދި ސާމާނު މަރާމާތު ކުރަން ވެސް އެކަށީގެންވާ ފައިސާ ނުލިބޭ ކަމަށް ބަޔާނުގައި ފާހަގަކޮށްފައިވެއެވެ.
ކުނި ނެގުމުގެ ޚިދުމަތް ރަނގަޅަށް ދެވޭނީ ގަވައިދުން ފީ ނެގިގެން ކަމަށް މިނިސްޓްރީން ވަނީ ބުނެފައެވެ. މިނިސްޓްރީގެ ބަޔާނުގައި ވާގޮތުން ކުނީގެ ފީ ކަރަންޓު ބިލާ އެކުވުމުން ދިމާވެފައިވާ މައްސަލައަށް ހައްލެއް ލިބިގެންދާނެއެވެ. އަދި އަންނަ މަހުން ފެށިގެން މި ބަދަލާއެކު ކުނި ބިލާއި ކަރަންޓު ބިލު އެއްކުރެވިގެންދާނެ ނަމަވެސް، ކުނީގެ ފީއަށް އެއްވެސް ބަދަލެއް ނާންނާނެ ކަމަށްވެސް މިނިސްޓްރީން ބުނެފައިވެއެވެ.
