ސަރުކާރު ހިއްސާވާ ކުންފުނިތަކުގެ ވެރިންނަށް ރައީސް ޑރ. މުހައްމަދު މުއިއްޒު މިއަދު ވަރުގަދަ އިންޒާރެއް ދެއްވައިފިއެވެ. އެއްވެސް އެސްއޯއީއެއްގެ ވެރިއަކު ކޮރަޕްޝަނަށް މަގުފަހިވާ ގޮތަށް އެއްވެސް ކަމެއް ކުރި ކަމުގެ މައުލޫމާތު ލިބިވަޑައިގެންފިނަމަ ވަގުތުން ފިޔަވަޅު އަޅުއްވާނެ ކަމަށް ރައީސް ވިދާޅުވީ، އެޗްޑީސީން ބިންވެރިޔާ ސްކީމުން ބޭރުން ގޯތިތަކެއް ދީ، އެކަމުގެ ތަހިގީގު ދައުލަތުގެ މުވައްސަސާތަކުން މިއަދު ފަށާފައި ވަނިކޮށެވެ.
ބިންވެރިޔާ ސްކީމްގައި ނުހިމެނޭ ބަޔަކަށް ގޯތިތަކެއް ދީފައިވާ މައްސަލައެއް ހޫނުވެގެން އުޅޭ ދަނޑިވަޅެއްގައި، ސަރުކާރު ހިއްސާވާ ކުންފުނިތަކުގެ ސީއީއޯއިންނާއި މެނޭޖިން ޑިރެކްޓަރުން ތިއްބަވާ ވަޓްސްއެޕް ގުރޫޕްގައި ރައީސް މިރޭ ފޮނުއްވި މެސެޖުގައި ވިދާޅުވީ، އެއްވެސް ބޭފުޅަކު ގަވާއިދާ ހިލާފަށް، ކޮރަޕްޝަނަށް މަގުފަހިވާ ގޮތަށް ނުވަތަ ބޭއިންސާފުން ކަމެއް މަގުފަހިވާ ގޮތަށް ކަމެއް ކޮށްފިނަމަ އަޅަންޖެހޭ ފިޔަވަޅެއް އަޅުއްވާނެ ކަމަށެވެ.
އެއްވެސް ބޭފުޅަކު ގަވާއިދާ ހިލާފަށް ނުވަތަ އުސޫލާ ހިލާފަށް އެއްވެސް ކަމެއް އެއްވެސް މީހަކަށް ކޮށްދީފި ނަމަ ނުވަތަ ކޮރަޕްޝަންގެ އަމަލެއް ހިންގައިފި ނަމަ ނުވަތަ ހިންގަން ފުރުސަތު ދީފި ނަމަ ނުވަތަ އެއްވެސް މީހަކަށް ބޭއިންސާފުން ކަމެއް މަގުފަހި ކޮށްދީފި ނަމަ ނުވަތަ މިފަދަ އެއްވެސް މައުލޫމާތެއް އަޅުގަނޑަށް ލިބިއްޖެ ނަމަ އަޅުގަނޑު އަޅަން ޖެހޭ ފިޔަވަޅެއް އަޅާނެ ކަމުގައި ދަންނަވަން… ކޮރަޕްޝަން ޓޮލަރޭޓެއް ނުކުރާނަން. ޒީރޯ ޓޮލަރަންސް ހަގީގީ މާނައިގައި ތަންފީޒު ކުރާނެ ވާހަކަ ދަންނަވަން.
ވަޓްސްއަޕް ގުރޫޕަށް ރައީސް ފޮނުއްވި މެސެޖުގައި ވިދާޅުވެފައި ވެއެވެ.
ގޯތިތަކުގެ މައްސަލަ ފުލުހުންގެ އިތުރުން އެންޓި ކޮރަޕްޝަން ކޮމިޝަން (އޭސީސީ)އިން ވެސް ތަހުގީގު ކުރަމުންދާއިރު، އެޗްޑީސީގެ އެމްޑީ އިބްރާހިމް ފަޒުލް ރަޝީދު ވަނީ ސަސްޕެންޑްކޮށްފައެވެ. މީގެ އިތުރުން ބޯޑުގެ އެންމެ ފަހުން ޗެއާމަންކަމަށް އައްޔަންކުރި އަހްމަދު ނާސިފް (ޑީޑީ) ފިޔަވައި ހުރިހާ ބޭފުޅުން މިއަދު ވަނީ ސަސްޕެންޑްކޮށްފައެވެ. ބޯޑު ސަސްޕެންޑްކޮށްފައިވާއިރު، އެޗްޑީސީގެ އައިޓީ ކޮންސަލްޓެންޓް އަބްދުﷲ ޝުހޫދާއި، ޗީފް ފައިނޭންޝަލް އޮފިސަރު އަބްދުﷲ ފާއިދާއި، ޗީފް ބިޒްނަސް އޮފިސަރު އަދި މީޑިއާ ޑިޕާޓްމެންޓްގެ ހެޑް އަހުމަދު ޔާމީން އަދި ރިއަލްއެސްޓޭޓް ޑެޕިއުޓީ ޑިރެކްޓަރު އަހުމަދު އައިމަން ވެސް މިހާރު ވަނީ ސަސްޕެންޑްކޮށްފައެވެ.
ރިޔާސީ އިންތިހާބުގެ ކެމްޕެއިނުގެ ދުވަސްވަރުން ފެށިގެން ވެރިކަމަށް ވަޑައިގަތުމަށް ފަހު ވެސް ރައީސް މުއިއްޒު ވިދާޅުވަމުން ގެންދަވަނީ ސަރުކާރުން ކޮރަޕްޝަނާ ދެކޮޅަށް މަސައްކަތް ކުރައްވާނެ ކަމަށެވެ. ރިޔާސީ އިންތިހާބުގައި ލިބިވަޑައިގަތް ކާމިޔާބީއާ ގުޅިގެން ޝުކުރު އަދާކުރެއްވުމަށް ބޭއްވެވި ޖަލްސާގައި ކޮރަޕްޝަންގެ އަމަލުތައް ހިންގާ ނަމަ ސަރުކާރުން އިސްވެ އެ ފަރާތްތަކާމެދު އަޅަންޖެހޭ ފިޔަވަޅު އަޅުއްވާނެ ކަމަށް ވިދާޅުވިއެވެ. އަދި ސަރުކާރުގެ ނިޒާމުގެ ތެރޭގައި އެފަދަ ކަންކަން މަދުކޮށް، ސާފު ސަރުކާރެއް ގާއިމުކޮށްދިނުމަކީ އެމަނިކުފާނުގެ އަމާޒެއް ކަމަށާއި، ރައްޔިތުންނަށް ފެންނާނީ ދެފުށް ފެންނަ، އެއްވެސް ކަމެއް ނުފޮރުވާ، ޖަވާބުދާރީވުމުގައި ޖެހިލުމެއްނުވާ ސާފު ސަރުކާރެއް ކަމަށް ވަނީ ވިދާޅުވެފައެވެ.
