ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) ގެ ޑެޕިއުޓީ ސީއީއޯ ޝިއުނާ އަހުމަދު މަގާމުން ވަކިކުރުމަށްފަހު އެ މަގާމުވެސް ސަރުކާރުން އުވާލާއިފިއެވެ. ޝިއުނާ މަގާމުން ވަކިކޮށް އެމާގާމް އުވާލި މިވަގުތަކީ އެންސްޕާއަށް އެ އޮފީސް ހިންގުމަށް ކުއްޔަށް ނަގާފައިވާ އިމާރާތުގެ ދެ ފަންގިފިލާ މޯލްޑިވްސް މީޑިއާ ހައުސް ޕްރައިވެޓް ލިމިޓެޑަށް ކުއްޔަށް ދިނުމާ ގުޅޭ ކޮރަޕްޝަންގެ ތުހުމަތު އަމާޒުވެފައިވާ ދަނޑިވަޅެކެވެ. މި މައްސަލަ އެންޓި ކޮރަޕްޝަން ކޮމިޝަން (އޭސީސީ) އިން ވެސް މިހާރު ދަނީ ތަހުގީގު ކުރަމުންނެވެ.
އެންސްޕާއިން މައުލޫމާތު ދިން ގޮތުގައި، އެ އޭޖެންސީ ހިންގަމުންދާ މޫކައި ސުއިޓްސް އިމާރާތް މަރާމާތު ކުރުމަށްޓަކައި ހުސްކުރުމަށް އެންގުމާ ގުޅިގެން، އޮފީސް ހިންގާނެ ތަނެއް ހޯދުމަށް ފިނޭންސް މިނިސްޓްރީގެ އޯޕަން ޓެންޑަރ އިން ހުޅުވާލައިގެން، އެކަމާ ގުޅުންހުރި ގަވައިދުތަކާއި އުސޫލުތަކުގެ މަތިން އެމްއެމްޓީވީ އަށް އިމާރާތުގެ ފަންގިފިލާތަކެއް ކުއްޔަށް ދީފައިވަނީއެވެ.
