ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އިން ރާއްޖޭގެ ރިސާޗް އަދި އުފެއްދުންތެރިކަމުގެ ދާއިރާ އިތުރަށް ކުރިއެރުވުމަށްޓަކައި އައު މަގެއް ތަނަވަސްކޮށްދިނުމުގެ ގޮތުން ސްޓެލްކޯ ރިސާޗް ފައުންޑޭޝަން މިއަދު ރަސްމީކޮށް އިފްތިތާހުކޮށްފިއެވެ.
ސްޓެލްކޯ ހެޑް އޮފީހުގައި މިއަދު ހެނދުނު ބޭއްވުނު ޚާއްޞަ ރަސްމިއްޔާތެއްގައި މި ފައުންޑޭޝަން އިފްތިތާހުކޮށްދެއްވީ ކުންފުނީގެ މެނޭޖިންގ ޑިރެކްޓަރ ހުސައިން ފަހުމީއެވެ. މި ފައުންޑޭޝަނަކީ ސައިންސް، ޓެކްނޮލޮޖީ، އިންޖިނިއަރިންގ، އާޓްސް އަދި މެތަމެޓިކްސް ދާއިރާތަކުން ޒަމާނީ ދިރާސާތަކާއި އާ ޓެކްނޮލޮޖީތަކަށް އަހުލުވެރިވެ، ޤައުމުގެ ތަރައްޤީއަށް ބޭނުންވާ ހަރުދަނާ އަދި ޒަމާނީ ހައްލުތައް ހޯދައިދިނުމަށް މަގުފަހިކުރުމަށް އުފައްދާފައިވާ ފައުންޑޭޝަނެކެވެ.
އިފްތިތާހީ ރަސްމިއްޔާތުގައި ވާހަކަފުޅު ދައްކަވަމުން ހުސައިން ފަހުމީ ވިދާޅުވީ މި ފައުންޑޭޝަނަކީ ހަމައެކަނި ޖަލްސާއެއް ބާއްވައި ނިންމާލާ ތަނަކަށް ވެގެން ނުވާނެ ކަމަށާއި، ވިސްނުމާއި ފިކުރުކުރުމުގެ ތެރެއިން ޤައުމަށް މީގެ ފައިދާ ކުރަންޖެހޭނެ ކަމަށެވެ. އަދި ފަހުމީ ފާހަގަކުރެއްވި ގޮތުގައި ސްޓެލްކޯގައި އެކި ދާއިރާތަކުން ކިޔަވައިގެން ތިބި ތަޢުލީމީ ޒުވާނުންނާއި، ކުންފުނީގެ ވަސީލަތްތަކާއި ޤާބިލުކަން މި މަސައްކަތަށް އެހީތެރިވެދޭނެއެވެ.
މި ފައުންޑޭޝަން އުފެދުމާއެކު، ރާއްޖޭގެ ރިސާޗް އަދި އުފެއްދުންތެރިކަމުގެ ދާއިރާއަށް އައު ހިތްވަރަކާއި ކުރިއެރުމެއް ލިބިގެންދާނެކަމުގެ އުއްމީދު އާވެގެން ދިޔައެވެ.
