2025 ވަނަ އަހަރު ދައުލަތުގެ ބަޖެޓުން ފައިސާ ލިބޭނީ ފަސް ސިޔާސީ ޕާޓީއަކަށް ކަމަށް އިލެކްޝަންސް ކޮމިޝަނުން ބުނެފިއެވެ. އެއީ އެމްޑީޕީ، އަދާލަތު ޕާޓީ، ޖުމްހޫރީ ޕާޓީ، އެމްޑީއޭ އަދި ކޮންގްރެސް ޕާޓީއެވެ.
ގަވާއިދުގައިވާ ގޮތުން، ދައުލަތުގެ ބަޖެޓުން ފައިސާ ލިބެނީ އެ ޕާޓީއެއްގެ ދަފްތަރުގައި މަދުވެގެން 10،000 މެންބަރުން ތިބި ޕާޓީތަކަށެވެ. މި އަދަދު ބަލަނީ ދައުލަތުގެ ބަޖެޓް ފާސްކުރާ ދުވަހުގެ ނިޔަލަށެވެ. 2025 ވަނަ އަހަރުގެ ބަޖެޓް ފާސްކުރި ދުވަހު 10،000 މެންބަރުން ހަމަވި ހަ ޕާޓީގެ ތެރެއިން، 34،000 އަށްވުރެ ގިނަ މެންބަރުން ތިބި ޕީޕީއެމް އުވާލުމުގެ މަރުހަލާ ފެށިފައިވާތީ، އެ ޕާޓީ ވަނީ ފައިސާ ލިބޭ ޕާޓީތަކުގެ ލިސްޓުން އުނިކުރެވިފައެވެ.
މިވަގުތު ލިބެން ހުރި މައުލޫމާތުތަކަށް ބަލާއިރު، އެމްޑީޕީ އަކީ 50،851 މެންބަރުންނާއެކު އެންމެ ގިނަ މެންބަރުން ތިބި ޕާޓީއެވެ. ކޮންގްރެސް ޕާޓީގައި 28،983 މެންބަރުން ތިބިއިރު، ޖުމްހޫރީ ޕާޓީގައި 17،379 މެންބަރުން ތިބިކަން ފާހަގަކުރެވެއެވެ. އަދާލަތު ޕާޓީ އާއި އެމްޑީއޭގައި މިވަގުތު ތިބީ 8،500 މެންބަރުންނެވެ. މިދިޔަ އަހަރުވެސް މި ދެ ޕާޓީގައި ގިނަ ދުވަސްތަކެއްގައި 10،000 މެންބަރުން ހަމަނުވި ނަމަވެސް، ބަޖެޓް ފާސްކުރުމުގެ ކުރިން އިތުރު މެންބަރުން ހޯދައި އަދަދު ހަމަކުރި އެވެ. ނަމަވެސް ދުވަސްކޮޅެއް ފަހުން މެންބަރުންގެ އަދަދު އަލުން މަދުވެގެން ދިޔައެވެ.
