މާދަމާއިން ފެށިގެން ކުރިޔަށް އޮތް 4 ދުވަހު ރާއްޖޭގެ މޫސުމުގެ އިތުރަށް ގޯސްވާނެ ކަމަށް ލަފާކުރެވޭ ކަމަށް މެޓް އޮފީހުން ބުނެފިއެވެ. މެޓް އޮފީހުން ބުނެފައިވަނީ، މެދު ރާއްޖެތެރެ އާއި ދެކުނު ސަރަހައްދުގައި ވައިގަދަވެ، ކަނޑުތައް ގަދަވުމުގެ އިތުރުން ބައެއް ރަށްރަށަށް އުދައިގެ އަސަރު ކުރުމަކީވެސް އެކަށީގެންވާ ކަމެއް ކަމުގައެވެ.
މި ދުވަސްވަރަކީ ރާއްޖެއަށް ހުޅަނގު މޫސުން ނިމި އިރުވައި މޫސުން ފެށޭ ދުވަސްވަރު ކަމަށްވުމާއެކު، ކޮޅިގަނޑު އުފެދުމުގެ ފުރުސަތު އޮތް ކަމަށް މެޓް އޮފީހުން ވަނީ އަންގާފައެވެ. މިގޮތުން، ބަންގާޅު ކަނޑުގައި އުފެދިފައިވާ ކޮޅިގަނޑެއް ކުރިއަށް އޮތް 2 ދުވަހުގެ ތެރޭގައި ދެކުނު އިންޑިއާގެ ޓެމިލްނާޑޫގެ އައްސޭރިފަށާ ދިމާއަށް ޖެހޭނެ ކަމަށް ލަފާކުރެވެއެވެ. އަދި ރާއްޖެއާ ދުރުން ދެކުނުގައި ވެސް ކޮޅިގަނޑެއް އުފެދި ހުޅަނގަށް ޖެހެމުންދާނެ ކަމަށް މެޓް އޮފީހުން ބުނެފައިވެއެވެ.
އިއްޔެ ކުރި ވިއްސާރައިގެ ސަބަބުން ނ. ހެނބަދޫގެ 75 ގެއަކަށް ފެންވަދެ ގެއްލުންތަކެއް ލިބިފައިވެއެވެ. ހެނބަދޫގެ އިތުރުން ޅ. ކުރެންދޫ އަދި ނ. ކެނދިކުޅުދޫ އަށް ވެސް ވިއްސާރައިގެ ސަބަބުން ގެއްލުންތަކެއް ލިބިފައިވާ ކަމަށް ވަނީ ރިޕޯޓުކުރެވިފައެވެ.
