މ.މުލީ އެއާޕޯޓު އަންނަ ފެބްރުއަރީ މަހު ހުޅުވިގެންދާނެ ކަމަށް އެމްޓީސީސީގެ މެނޭޖިން ޑިރެކްޓަރު އަޙްމަދު ސަޢުދީ ވިދާޅުވެއްޖެއެވެ.
އެމްއެމްޓީވީގެ ޕްރޮގްރާމެއްގައި ވާހަކަ ދައްކަވަމުން ސަޢުދީ ފާހަގަކުރެއްވީ މިއީ ދިގު މުއްދަތެއް ހޭދަވެފައިވާ މަޝްރޫއެއް ނަމަވެސް، މިހާރު މަސައްކަތް އަވަސް ސްޕީޑެއްގައި ކުރިއަށްދާ ކަމަށެވެ. މި ގޮތުން އެމްޓީސީސީގެ މަހާ ޖައްރާފު އެ ރަށުގައި ބާއްވައިގެން އިތުރު ބިން ހިއްކުމުގެ މަސައްކަތާއި، ޓާމިނަލް އިމާރާތާއި ލައިޓިންގ ސިސްޓަމްގެ މަސައްކަތްތައް ދަނީ ކުރިއަށެވެ.
ސަޢުދީ އިތުރަށް ހާމަކުރެއްވި ގޮތުގައި އެމްޓީސީސީން މިހާރު އެންމެ އިސްކަމެއް ދެނީ މުލީ އެއަރޕޯޓުގެ މަސައްކަތް ނިންމުމަށެވެ. އަދި ރައީސް ޑރ. މުހައްމަދު މުއިއްޒުގެ ވެސް އެދިވަޑައިގަންނަވާ ގޮތަކީ ފެބްރުއަރީ މަހުގެ ނިޔަލަށް އެއަރޕޯޓަށް ފްލައިޓް ޖެއްސި، ރައްޔިތުންނަށް ޚިދުމަތް ދެވޭ ފެންވަރަށް ތަން ތައްޔާރުވެގެން ދިއުމެވެ.
މުލީގައި ބިން ހިއްކައިގެން އެއަރޕޯޓް ތަރައްޤީ ކުރުމުގެ މަޝްރޫޢު އެމްޓީސީސީއާ ހަވާލުކުރެވުނީ 2021 ވަނަ އަހަރުއެވެ. މި މަޝްރޫޢުގެ އަގަކީ 212 މިލިއަން ރުފިޔާއެވެ.
