ރާއްޖޭގައި 12 އަހަރު ވަންދެން ވިސާ ނެތި ދިރިއުޅެމުން އައި ފްރާންސްގެ އާއިލާއެއް ފޮނުވާލުމުގެ މައްސަލައިގައި ރޭ އާޓިފިޝަލް ބީޗުގައި ސުލްހަވެރި އިހުތިޖާޖެއް ބާއްވައިފިއެވެ. އަނިޔާ ލިބެމުންދާ މުސްލިމުންގެ ހައްގުގައި މަސައްކަތްކުރާ ޔޫތު ފޯ ޔުނިޓީން އިންތިޒާމު ކުރި މި އިހުތިޖާޖުގައި، އެ އާއިލާ ފޮނުވާލުމާ ދެކޮޅަށް ބެނާ ހިފައިގެން ޝުއޫރު ފާޅުކުރިއެވެ.
ހަ މެންބަރުންގެ މި އާއިލާ ރާއްޖޭގައި ހޭދަކުރި 12 އަހަރުގެ ތެރޭގައި ދެ ކުއްޖަކު ވަނީ ރާއްޖޭގައި އުފަންވެފައެވެ. އިމިގްރޭޝަނުން މަޢުލޫމާތު ދެމުން ބުނެފައިވަނީ މި އާއިލާގެ ޕާސްޕޯޓުތަކުގެ މުއްދަތު ހަމަވެފައިވާތީ، އެ މީހުން ފޮނުވާލުމަށް ބޭނުންވާ ޓްރެވަލް ޑޮކިއުމަންޓްތައް ހޯދުމުގެ މަސައްކަތް ކުރަމުންދާ ކަމަށާއި، އެ ލިޔެކިޔުންތައް ލިބުމާއެކު ވީ އެންމެ އަވަހަކަށް އެ މީހުން ފޮނުވާލާނެ ކަމަށެވެ.
އިހުތިޖާޖުގައި ބައިވެރިންގެ ބެނާތަކުގައި ފާހަގަކޮށްފައިވަނީ މި އާއިލާ 12 އަހަރު ވަންދެން ރާއްޖޭގައި އުޅުނު އިރު އެއްވެސް ގޯނާއެއް ކޮށްފައިނުވާތީ، އެ މީހުން ފޮނުވާނުލުމަށް އެދޭ ކަމަށެވެ.
މި މައްސަލައިގައި ދިވެހިންގެ ޚިޔާލު ވަނީ ދެބައިވެފައެވެ. ބައެއް މީހުން ދެކޭގޮތުގައި މި އާއިލާ ފޮނުވާނުލާނަމަ، ނުގަވާއިދުން ދިރިއުޅޭ ބަނގުލަދޭޝް މީހުންވެސް ފޮނުވާލައިގެން ނުވާނެއެވެ. ނަމަވެސް އިހުތިޖާޖުގެ ބައިވެރިއަކު ފާހަގަކުރި ގޮތުގައި އިސްލާމްދީނަށް އުޅުމުގައި ހުރަހެއް ނެތް ބަނގުލަދޭޝް ފަދަ ޤައުމަކާއި ފްރާންސް ފަދަ ޤައުމެއްގެ މުސްލިމުންނާ އަޅާކިޔައިގެން ނުވާނެއެވެ.
