ހުޅުމާލޭގައި އެއްގަމު ދަތުރުފަތުރަށް ހުރަސް އެޅި ޑްރައިވަރުން ހައްޔަރުކުރުމާ ގުޅިގެން އިކޮނޮމިކް މިނިސްޓަރު ފައްޔާޒް އިސްމާއިލް ކަންބޮޑުވުން ފާޅުކުރައްވައިފިއެވެ.
ރާއްޖޭގައި ސަރުކާރުން ޓެކްސީ ލައިނެއް ފަށަން އުޅޭ ކަމަށް ބުނެ، އެކަމާ މެދުގައި ހިތްހަމަނުޖެހިގެން 30 ވަރަކަށް ޓެކްސީ ޑްރައިވަރުން ރޭގައި ވަނީ ހުޅުމާލޭގައި މުޒާހަރާކޮށްފައެވެ. އަދި އެ ޓެކްސީ ޑްރައިވަރުން ވަނީ ހުޅުމާލޭގައި ހުންނަ އެމްޑަބްލިއުއެސްސީ ކައިރިއަށް ޖަމާވެ، އާންމު ދަތުރުފަތުރަށް ހުރަސް އަޅައިފައެވެ. އެކަމަކު، ފުލުހުން ގޮސް އެ ކާރުތައް އެ ސަރަހައްދުން ވަނީ ނަގައިފައެވެ.
މިކަމުގެ ސަބަބުން މާލެ އާއި ހުޅުލެއަށް ދާން އުޅުނު ގިނަ ބަޔަކަށް ގިނަ ދަތިތަކާ ކުރިމަތިލާން ޖެހުނެވެ. ފުލުހުން ވަނީ ބައެއް ޓެކްސީ ޑްރައިވަރުން ހައްޔަރުކޮށްފައެވެ.
ފައްޔާޒް "އެކްސް" ގައި ކުރެއްވި ޕޯސްޓެއްގައި ވިދާޅުވީ ސަރުކާރުން ޓެކްސީ ލައިނެއް ފެށުމާ މެދު ހިތްހަމަނުޖެހުން ފާޅުކުރުމަށް އިހުތިޖާޖު ކުރި ޓެކްސީ ޑްރައިވަރުންތަކެއް ހައްޔަރުކޮށް ކާރުތައް ޓޯ ކުރުމަކީ ކަންބޮޑުވުމެއް ކަމަށެވެ.
އިހުތިޖާޖު ކުރުމަށްޓަކައި ހަޅުތާލު ކުރުމަކީ ކޮންމެ މީހަކަށް ގާނޫނުއަސާސީން ކަށަވަރު ކޮށްދޭ ހައްގެއް ކަމަށް ފައްޔާޒް ވިދާޅުވިއެވެ.
"ހަޅުތާލުކޮށްގެން ހައްޔަރުކުރި ހުރިހާ ޓެކްސީ ޑްރައިވަރުން ދޫކޮށްލައި ޓޯކުރި ވެހިކަލްތައް ވެރިފަރާތްތަކާ ހަވާލުކުރުމަށް ގޮވާލަން." ފައްޔާޒް ވިދާޅުވިއެވެ.
