ކ. ހުރާ ބަނދަރު ނިންމަވައި ދެއްވާނީ ރައްޔިތުން އެދޭ ގޮތަށް ކަމުގައި ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.
މާލެ އަތޮޅުގެ ބައެއް ރަށްތަކަށް ފެއްޓެވި ދަތުރުފުޅުގައި ހުރަޔަށް ވަޑައިގެން އެ ރަށުގެ ރައްޔިތުންނާ ބައްދަލު ކުރައްވައި ވާހަކަފުޅު ދައްކަވަމުން ރައީސް ޑރ. މުއިއްޒު ވިދާޅުވީ އަންނަ އަހަރުގެ ބަޖެޓުގައި އެންމެ އިސްކަން ދެއްވާނީ ގެދޮރުވެރިކަން ނުވަތަ ބޯހިޔާވަހިކަމަށް ކަމަށާއި އޭގެ އިތުރަށް ދެން އިސްކަންދެއްވާނެ ކަމަކީ ތައުލީމީ ދާއިރާއަށް ކަމަށާއި އަދި ހަމަ ތަޢުލީމީ ދާއިރާއެކޭ އެއްވަރަށް ޞިއްޙީ ދާއިރާއަށްވެސް އިސްކަންދެއްވާނެ ކަމަށެވެ.
ހުރާ ސްކޫލަށް ބޭނުންވާ މަލްޓިޕަރޕަސް ހޯލު، އަންނަ އަހަރުގެ ބަޖެޓުގައި ހިމަނުއްވައިގެން، އަޅުއްވައިދެއްވާނެ ކަމުގައި އެމަނިކުފާނު ވިދާޅުވިއެވެ. އަދި ސިއްހީ ދާއިރާއިން ހުރާ ރައްޔިތުން އެދޭ ކަންކަމުގެ ތެރެއިން، ސިއްހީ މަރުކަޒު ތަރައްގީކޮށް، ސްކޭން ކުރުމާއި އިތުރު ވަސީލަތްތައް ގާއިމުކޮށް ފުރިހަމަކޮށްދެއްވާނެ ކަމުގެ ޔަގީންކަން ރައީސް ދެއްވިއެވެ.
ޖުމްލަ ގޮތެއްގައި ތަރައްގީގެ މަޝްރޫއުތައް ކުރިއަށްގެންދަވާނީ ރަށްރަށުގެ ރައްޔިތުން އެދިވަޑައިގަންނަވާ ގޮތަށް ކަމަށާއި ވެވަޑައިގެންފައިވާ ވަޢުދުތައް ފުއްދެވުމަށް އިސްކަންދެއްވައިގެން، މިއަންނަ 2025 އަދި 2026 ވަނަ އަހަރަކީ އެގޮތަށް ކަންކަން ތަރުތީބުކުރައްވައިގެން ކުރިއަށް ގެންދަވާނެ ދެ އަހަރުކަން، އެމަނިކުފާނުގެ ވާހަކަފުޅުގައި ފާހަގަކުރެއްވިއެވެ.
އަދި މިއަންނަ އަހަރު ގިނަ މަޝްރޫޢުތައް ފެށޭނެ ކަމަށާއި، އަންނަ އަހަރު ނުފެށޭ މަޝްރޫޢުތައް ޖެހިގެން އަންނަ 2026 ވަނަ އަހަރު ފެށޭނެ ކަމުގައި އެމަނިކުފާނު ވިދާޅުވިއެވެ. އެގޮތުން މި ދެ އަހަރު ވެގެންދާނީ އިންތިޚާބުގައި ވެވަޑައިގެންފައިހުރި ވަޢުދުތައް، ޢަމަލީގޮތުން ފުދިގެންދާނެ ދެ އަހަރަށް ކަމުގައި ރައީސް ވިދާޅުވިއެވެ.
"މި ދެ އަހަރު (2025-2026) ވެގެން ދާނީ އަޅުގަނޑު އިންތިހާބުގައިވީ ވައުދުތައް އަމަލީ ގޮތުން ފުދިގެންދާ ދެ އަހަރަށް. އެގޮތަށް އިރާދަކުރެއްވިއްޔާ ތަރުތީބު ކުރެވިގެން މިދަނީ. މި އަހަރު ބޭނުން ކުރަން ޖެހުނީ ބޮޑު ދަރަންޏެއްގައި އަޅުގަނޑުމެން ބެދިފައި އޮތީމަ، އަޅުގަނޑުމެންގެ އިގްތިސާދު ބަނގުރޫޓުވުމުގެ މަގުމަތީގައި އޮތީމަ އެކަމުން ސަލާމަތްވުމަށް (މަސައްކަތް ކުރީ). ފައިސާ ޗާޕުނުކުރީމަ ވަރަށް ގިނަ ކަންކަން ހަމައަކަށް އަޅުވަން ޖެހުނު،" ރައީސް ވިދާޅުވިއެވެ.
