ހައިކޯޓުން މިއަދު އިއުލާން ކުރި ގޮތުގައި ކުރީގެ ނައިބު ރައީސް އަދި ކުރީގެ ފިނޭންސް މިނިސްޓަރު އަބްދުﷲ ޖިހާދުއާ ދެކޮޅަށް ދައުލަތުން ހުށަހެޅި މައްސަލަ ބަލައިނުގަތުމަށް ފަނޑިޔާރުންގެ މެޖޯރިޓީން ވަނީ ނިންމާފައެވެ. ނަމަވެސް މި ނިންމުމާމެދު ފަނޑިޔާރުންގެ މެދުގައި ހިޔާލު ތަފާތުވުން އުފެދުނެވެ.
މި މައްސަލައަކީ 2013 ވަނަ އަހަރު ފިނޭންސް މިނިސްޓަރުކަމުގައި ހުންނަވައިގެން ކ. ފުށިދިއްގަރުފަޅުގައި ހިންގި މަޝްރޫއަކާ ގުޅިގެން ޖިހާދުގެ މައްޗަށް އުފުލުނު ދައުވާއެކެވެ. ދައުލަތުން ދައުވާކުރީ އެ އެއްބަސްވުމުގައި ސޮއިކުރެއްވުމުގައި ދައުލަތަށް ފައިދާނުވާ ގޮތަށް އަމަލުކުރެއްވި ކަމަށް ބުނެއެވެ.
ކުރިން މި މައްސަލަ ހައިކޯޓުން ބޭރުކޮށްލީ ޖިހާދަށް ޗިޓު ރައްދުކުރެވޭނެ ގޮތް ހޯދުމަށް ދިން 15 ދުވަހުގެ މުއްދަތުގައި ޕީޖީ އޮފީހުން މައްސަލަ ހުށަނޭޅުމުންނެވެ. އޭގެ ފަހުން މައްސަލަ އަލުން ހުށަހެޅުމުން، ފަނޑިޔާރު ހުޒައިފާ މުހައްމަދު އަދި ދީބާނާޒް ފަހުމީ މައްސަލަ ބަލައިނުގަތުމަށް ނިންމެވި އިރު، ފަނޑިޔާރު ހަސަން ޝަފީއު ނިންމެވީ މައްސަލަ ބަލައިގަތުމަށެވެ.
ޕީޖީ އޮފީހުން ބުނެފައިވަނީ މި މައްސަލަ އިސްތިއުނާފްކުރީ ކްރިމިނަލް ކޯޓުގެ ނިންމުން ބިނާކުރި އަސާސެއް ނެތުމާއި އެކަށީގެންވާ މިންވަރަށް ސަބަބު ބަޔާންކޮށްފައި ނެތުމުންނެވެ. މިހާރު ޖިހާދު ހުންނެވީ މޯލްޑިވްސް އިންޓަނޭޝަނަލް ފައިނޭޝަލް ސާވިސް އޮތޯރިޓީގެ ޗެއާމަންގެ މަގާމުގައެވެ.
