ކުޅިވަރު ގާނޫނަށް މުހިންމު އިސްލާހުތަކެއް ގެނައުމަށް ރައްޔިތުންގެ މަޖިލީހަށް ހުށަހަޅައިފިއެވެ. ސަރުކާރުގެ ފަރާތުން ދިއްދޫ ދާއިރާގެ މެންބަރު އަބްދުއްލަތީފް ހުށަހެޅުއްވި މި އިސްލާހުތަކުގެ ތެރޭގައި، ޕެރައެތުލީޓުންނަށް އިތުރު ފުރުސަތުތައް ހޯދައިދިނުމަށް ގާނޫނީ ބާރުވެރިކަން ލިބިގެންވާ މޯލްޑިވްސް ޕެރަލިމްޕިކް ކޮމިޓީއެއް ގާއިމްކުރުން ހިމެނެއެވެ.
މި އިސްލާހުގެ ދަށުން، ގާނޫނަށް އަމަލުކުރަން ފަށާ ތާރީހުން ފެށިގެން މިހާރު އޮތް ޕެރަލިމްޕިކް ޖަމިއްޔާ ބަދަލުވެގެންދާނީ ވަކި ގާނޫނީ ޝަޚްސަކަށެވެ. މި ކޮމިޓީއަކީ އަމިއްލަ ނަމުގައި ދައުވާކުރުމާއި ދައުވާ ލިބިގަތުމުގެ ބާރު ލިބިގެންވާ، މުދާ މިލްކުކޮށް ތަސައްރަފްކުރުމުގެ ހައްގު ލިބިގެންވާ، އަދި މެންބަރުންނާ ވަކިން އުފެދިފައިވާ، އަމިއްލަ ސިއްކައެއް އޮންނަ މިނިވަން މުއައްސަސާއަކަށް ވެގެންދާނެއެވެ.
ކޮމިޓީގެ މައިގަނޑު މަގްސަދަކީ ބައިނަލްއަގްވާމީ ޕެރަލިމްޕިކް ކޮމިޓީގެ އުސޫލުތަކާ އެއްގޮތަށް ރާއްޖޭގައި ޕެރަލިމްޕިކް ހަރަކާތްތައް ކުރިއަރުވައި، ދެމެހެއްޓެނިވި ގޮތެއްގައި ތަރައްގީކުރުމެވެ. އަދި މި ކޮމިޓީން ބައިނަލްއަގްވާމީ މުބާރާތްތަކަށް ގައުމީ ޓީމުތައް ފޮނުވުމުގެ އިންތިޒާމްތައް ހަމަޖައްސައި، ކޮމިޓީގެ މުސްތަގިއްލުކަން ހިފެހެއްޓުމަށް މަސައްކަތްކުރާނެއެވެ.
މީގެއިތުރުން، މި އިސްލާހުތަކުގެ ތެރޭގައި ކުޅިވަރު އެސޯސިއޭޝަންތަކުގެ މާލީ ކަންކަން ބެލެހެއްޓުމަށް ހާއްސަ ގަވާއިދުތަކެއް އެކުލަވާލުމަށް ލާޒިމްކުރާ މާއްދާތަކެއްވެސް ހިމެނެއެވެ. މި ގަވާއިދުތައް އެކުލަވާލާނީ ސްޕޯޓްސް ކޮމިޝަނަރުގެ ލަފާގެ މަތިންނެވެ.
ހަމައެއާއެކު، ޑޮޕިންގ އިދާރާއާއި ނެޝަނަލް އިންސްޓިޓިއުޓްގެ ދައުރު ފުޅާކުރުމަށާއި، ރައީސް ޑރ. މުހައްމަދު މުއިއްޒު އުފެއްދެވި ކުޅިވަރު ފަންޑު މެނޭޖްކޮށް ބެލެހެއްޓުމާ ގުޅޭ އިސްލާހުތަކެއްވެސް މި ބިލުގައި ހިމަނާފައިވެއެވެ.
