މީ ދެ އަހަރެއްހާ ދުވަސްފަހުން، ސަރުކާރުތަކުން ނަގާފައިވާ ލޯންތަކަށް ފައިސާ ދައްކަން ޖެހޭއިރު، ރިޒާވްގައި އެ އަދަދު ނެތްނަމަ ޑީފޯލްޓް ހާލަތަކަށް ގޮސްދާނެކަމަށް އެމްއެމްއޭގެ ގަވަރުނަރު އަހުމަދު މުނައްވަރު ވިދާޅުވެއްޖެއެވެ.
އެމްއެމްއޭއިން ބޭއްވި ނޫސްވެރިންގެ ބައްދަލުވުމުގައި މުނައްވަރު ވިދާޅުވީ، ދުނިޔޭގެ އެއްވެސް ގައުމެއްގައި ފޮރިން އެކްސްޗޭންޖް ގާނޫނެއް ނުވަތަ ގަވާއިދުތަކެއް ނެތި ނުހިންގޭނެ ކަމަށެވެ. އަދި ރާއްޖޭގައި މެކްރޯ މައްސަލަތަކެއް ހުރިކަން ގަބޫލުކުރައްވާ ކަމަށާއި، ނަމަވެސް މިދިޔަ ފަސް އަހަރު ތެރޭގައި ޗާޕުކުރެވުނު 8 ބިލިއަން ރުފިޔާއަކީ ކުރީގެ ސަރުކާރުތަކާ ނުބައްދަލު އަދަދެއްކަން ފާހަގަކުރެއްވިއެވެ.
އޭނާ ވިދާޅުވީ އެމްޑީޕީގެ ފަސް އަހަރުގެ ސަރުކާރުން އެއްވެސް ހާލަތެއް ނެތި ފައިސާ ޗާޕުކުރުމަށްފަހު، އެއްވެސް އެސެޓެއް އުފައްދާފައި ނުވާކަމަށެވެ.
މުނައްވަރު ވިދާޅުވި ގޮތުގައި، ކޮވިޑް-19 ގެ ބަލިމަޑުކަމަކީ 2020 އަދި 2021 ވަނަ އަހަރު ކުރިމަތިވި ކަމެއް ކަމަށްވާއިރު، އޭގެ ފަހުން އައި ދެ އަހަރު ފައިސާ ޗާޕުކުރަން ޖެހުނު ސަބަބަކީ ކޮބައިތޯ ސުވާލު އުފެދޭ ކަމަށެވެ. އަދި ރައީސް މުޙައްމަދު މުޢިއްޒުގެ ސަރުކާރުން މިހާތަނަށް އެއްވެސް ބަހަނާއެއް ދައްކައި ފައިސާ ޗާޕުކޮށްފައި ނުވާކަމަށާއި، މިހާރު މަސައްކަތް ކުރަމުންދަނީ ހުރި ގޮންޖެހުންތައް ހައްލުކުރުމަށް ކަމަށް ވިދާޅުވިއެވެ.
ކުރިއަށް އޮތް ދެ އަހަރުގެ އެންމެ ބޮޑު ގޮންޖެހުމަކީ، 500 މިލިއަން ޑޮލަރުގެ ދަރަންޏާއެކުވެސް ކުރީގެ ސަރުކާރުން އެއްވެސް އެސެޓެއް ނުއުފެއްދުން ކަމަށް މުނައްވަރު ފާހަގަކުރެއްވިއެވެ. އަދި ކުރިއަށް އޮތް ތަނުގައި އިތުރު ދަތިތަކާ ކުރިމަތިވެއްޖެނަމަ، އުނދަގޫ ހާލަތަކާ ކުރިމަތިލާން ޖެހިދާނެކަމަށް ވިދާޅުވިއެވެ.
ވަރަށް އެހެން ކަހަލަ ސިޗުއޭޝަނަކަށް ގޮސްދާނެ، ޑިފޯލްޓު ސިޗުއޭޝަނަކަށް ގޮސްދާނެ.
މުނައްވަރު ވިދާޅުވިއެވެ.
ކުރީގެ ރައީސް ޔާމީންގެ ވެރިކަމުގައި ދަރުމަވަންތަ ހޮސްޕިޓަލް އިންވެސްޓްކުރެވުނީ ސަނީ ސައިޑް ބޮންޑުން ކަމަށާއި، ދެ އަހަރު ފަހުން ފައިސާ ދައްކަންޖެހޭއިރު ރިޒާވްގައި އެ އަދަދު ނެތްނަމަ، ޑިފޯލްޓްގެ ހާލަތަކަށް ގޮސްދާނެކަމަށް މުނައްވަރު ވިދާޅުވިއެވެ. އަދި ރިޒާވް އިތުރުކުރުމަކީ ގާނޫނީގޮތުން އެމްއެމްއޭގެ ޒިންމާއެއް ކަމަށާއި، މިވަގުތު ރާއްޖޭގެ ރިޒާވް އޮތީ ހަމައެކަނި ސަރުކާރަށް ޕެސިވްކޮށް ކަމަށް ފާހަގަކުރެއްވިއެވެ.
ރައީސް މުޙައްމަދު މުޢިއްޒު ވިދާޅުވެފައިވަނީ، މިދިޔަ ފަސް އަހަރު ހައްދުފަހަނައަޅައި ފައިސާ ޗާޕުކުރުމުގެ ސަބަބުން ގައުމުގެ އިގްތިސާދީ ހާލަތު ދަށްވެ، މާލިއްޔަތު އަޑިނޭނގޭ އަނދަވަޅަކަށް ވެއްޓިފައިވާ ކަމަށެވެ. އަދި ލޯނު ނަގައިގެން ރައްޔިތުންނަށް މަންފާވާ އެއްވެސް ކަމެއް ކުރެވިފައިވޭތޯ ސުވާލު އުފައްދަވައި، ފައިސާ ޗާޕުކުރުމުގެ ހިތި ނަތީޖާ މި ސަރުކާރުން ގަބޫލުކުރާ ކަމަށާއި، އެހެންކަމުން ފަސޭހަ މަގެއްގެ ގޮތުން ފައިސާ ޗާޕުކުރުމުގެ ބަދަލުގައި ކައިރި ގައުމުތަކުން މިސާލު ނަގައި، ދެމެހެއްޓެނިވި އިގްތިސާދެއް ގެނައުމަށް މަސައްކަތްކުރައްވާނެ ކަމަށް ވިދާޅުވިއެވެ.
